थौं देय्न्यंकं मतदान
येँ – देय्न्यंकं थौं छन्हुं हे स्थानीय निर्वाचनया लागिं मतदान जुइत्यंगु दु । थौं सुथय् ७ बजेनिसें सनिलय् ५ बजे तक मतदान जुइगु खँ निर्वाचन आयोगं धाःगु दु । थौं जुइगु मतदानया लागिं मतदाता परिचयपत्र मदुसा नागरिकता वा थःगु परिचय खुले जुइगु न्ह्यागु भ्वं दुसां नं मत कुर्के बीगु खँ नं आयोगं धाःगु दु ।
थौं मतदान याइगु जूगुलिं म्हिगः व म्हीग सुनां गनं नं मत फ्वने मदइ कथं मौन अवधि तोके यानाहःगु खः । तर म्हिगः नं उम्मेदवारत धाःसा थीथी थासय् वनाः मनू नापलायेगु ज्याय् व्यस्त जुयाच्वंगु खँ सीदुगु दु । खास यानाः म्हिगः व्यक्तिगत रुपं फोन यानाः भोट फ्वनेगु ज्या तीव्र जूगु दु ।
चितवनय् माओवादी अध्यक्ष पुष्प कमल दाहालं मौन अवधिया इलय् नं मनू नापलानाः मतदाता प्रभावित यानाच्वन धासें एमालें विरोध याःगु दु । एमालें गठबन्धनया उम्मेदवारी हे खारेज यायेत माग याःगु दु । चितवनय् कांग्रेसया बागी उम्मेदवारयात ग्वाहालि यात धासें म्हिगः पार्टीं न्याम्ह कार्यकर्तायात साधारण सदस्यता तकं मदइ कथं कारवाही याःगु दु ।
मेखे जनकपुरय् मतदातायात ध्यबा इनाः प्रभावित यानाच्वन धासें एमाले कार्यकर्तातय्सं मुस्लिम आयोगया अध्यक्ष समिम अन्सारीयात घेराउ याःगु दु । अनया सीताशरण होटलय् च्वनाच्वंम्ह अन्सारीयात घेराउ यायेवं वय्कःयात बचे यायेगु लागिं प्रहरी समेत वयेमाःगु खःसा लिपा प्रहरीं हे बचे यानाः येँय् वयेत विमानस्थल तक त्वःतूगु दु । मौन अवधिया इलय् मतदाता प्रभावित यायेगु ज्या यानाच्वन धइगु घटना मेथाय् नं जूगु खबर वःगु दु ।
येँय् धाःसा गुलिं उम्मेदवारत म्हिगः थीथी द्यःया दर्शन यायेत वंगु खने दतसा गुलिं थःथितिया छेँय् वनाच्वंगु नं लूगु दु । थौं येँ महानगरपालिका दुने जक ३६३ गू मतदानस्थलय् मत कुर्केगु ज्या जुइ ।
येँय् धाःसा मतदान यायेगु लागिं आपालं मनूत पिहां वंगु कारणं सतक सुनसान जुयाः स्थानीय मनूतय्सं राहत महसुस याःगु दु । चुनावया लागिं लखौं पिहां वंगु अनुमान याःगु दु ।
LEAVE YOUR COMMENTS