पहिचानवादी आन्दोलनय् गोलीप्रहार

येँ (नेपालभाषा टाइम्स)- प्रदेश–१ या नां कोशीतःगु विरोधय् आन्दोलनय् कुहां वःपिं प्रदर्शनकारी व प्रहरी दथुइ ल्वापु जुयाः म्हिगः विराटनगरय् नीम्ह स्वयां अप्वः प्रदर्शनकारी घाइते जूगु दु । म्हिगः न्हिनय् विराटनगरया रोडशेष चोकय् प्रदर्शनकारी व प्रहरी दथुइ झडप जूगु खः । प्रहरीं प्रदर्शनकारीत नियन्त्रण कायेत १७ राउण्ड हवाईफायर व ४४ सेल टियर ग्यास कयेकूगु खः ।

पहिचानया आधारय् प्रदेशया नामाकरण यायेमाःगु व ‘कोशी’ नां खारेज यायेमाःगु माग यासें थीथी दल व संघसंस्थाया कार्यकर्तात विराटनगरया होटल बिगय् ग्वसाः ग्वःगु ज्याझ्वलय् प्रदेशसभा दुजःतय्सं ब्वति काइगु जानकारी वयेवं प्रदर्शनकारीतय्सं घेराउ याःगु खः । होटलय् दिगो विकास लक्ष्य प्राप्तिया निंतिं स्रोत व्यवस्थापन सम्बन्धी कार्यशालाय् सांसदतय्सं ब्वति काइगु ज्याझ्वः दुगु खः ।

होटल घेराउ यायेत वंपिं आन्दोलनकारीयात प्रहरीं पनेवं निगू पक्ष दथुइ झडप शुरु जूगु खः । झडपया झ्वलय् नेपाल प्रहरी व सशस्त्र प्रहरी बलया झिंन्याम्ह घाःपाः जूगु खःसा आन्दोलनकारीत नं गुम्ह घाःपाःजूगु खः । झडपय् डीएसपी विजय श्रेष्ठ नं घाःपा जूगु खः ।

आन्दोनकारीपाखें शिव आङ्दम्बे, उदय नेम्वाङ, ज्ञानप्रसाद राई, एन के दर्नाल आदिपिं घाःपाः जूगु खःसा उकी मध्ये प्यम्हेसित पारस अस्पतालय् वासः याकातःगु दु । झडप लिपा कोण सभा यानाः आन्दोलनकारीत लिहां वंगु खःसा वयां लिपा स्थिति सामान्य जूगु खः ।

वंगु फागुन १७ गते प्रदेशसभां प्रदेशया नां ‘कोशी’ तःगु खः । उकिया विरुद्ध पहिचान पक्षधरतय्सं हाकनं नामाकरण यायेमाःगु माग यासें संयुक्त संघर्ष समिति नीस्वनाः आन्दोलन याना वयाच्वंगु खः । थ्व आन्दोलनया झ्वलय् प्रहरी आक्रमणय् लानाः स्थानीयपद्म लिम्बुया मृत्यु जूगु खः ।