ताम्रकार समाजपाखें पुख्र्यौली पेशायात कयाः अन्तक्र्रिया

यल – वरिष्ठ कलाकारलिसें उद्यमी राजकुमार शाक्यं सिजः व लीया व्यवसायय् आकर्षण म्हो जुया वंगु खँय् चिउताः प्वंकादीगु दु । पुख्र्यौली पेशा सिजः व लीया थीथी कलात्मक हलंज्वलं दयेका वयाच्वंपिं ताम्राकार समुदाय थौंया इलय् थुगु पेशां पलायन जुइगु क्रम अप्वयेवं वय्कलं उकथंया चिउताः प्वंकादीगु खः ।

ताम्राकार समाजया व्यवसाय विकास उपसमितिया ग्वसालय् जूगु ‘सिजः व लीया व्यवसायय चुनौति व अवसर’ विषयय् जूगु अन्तक्र्रिया ज्याझ्वलय् नवासें वय्कलं लिच्छवीकालीन इलय् शुरु जुयाः मल्लकाल तक थ्यंगु इलय् थुकिया व्यवसाय स्वर्ण युग जूगु खःसां थौंया इलय् तक थ्यंगु अवस्थाय् अध्ययन लिपा जागिर, पेशाप्रति आकर्षणविहीन, न्हूगु प्रविधियात अंगीकार याये मफुगु व बजाःया उचित व्यवस्थापन याये मफुगुलिं ताम्रकार समुदायं थ्व पेशा हिला वनेत बाध्य जुयाच्वंगु खः धयादिल ।

पुलांगु हे शैलीया कार्यविधि, पारिवारिक बेमेल, याकःचा जक न्ह्याः वनेत स्वयेगु, प्रविधि व उपकरणया प्रयोग मयायेगु आदि कारणं थ्व पेशा याइपिं म्हो जुया वंगु वय्कःया धापू दु । समाजया नायः रविन्द्रराज ताम्रकारं सिजः लीया कलात्मक हलंज्वलं निर्माण याइपिं ताम्रकार कलाकारत देय्या हे सम्पत्ति खः धयादिल । वय्कलं अवसर दयेक दयेकं नं लबः कायेगुपाखे उद्यमीत सफल जुइ मफयाच्वंगु अवस्था दुगु धयादिल ।