३ नम्बरय् हाकुपतासि नं राष्ट्रिय पोशाक

येँ – स्वनिगः समेत दुथ्याःगु ३ नम्बर प्रदेशय् मिसापिं सांसदतय्गु औपचारिक पोशाकय् नेवाःतय्गु हाकुपतासि व तामाङतय्गु श्यामा नं समावेश जुइगु जूगु दु ।

३ नम्बर प्रदेश सभाया सभामुख सानु श्रेष्ठं ‘नेपालभाषा टाइम्स’ यात कनादी कथं विशेष न्हि कुन्हु अनिवार्य रुपं पुना वयेमाःगु औपचारिक पोशाक थुकथं जुइ धकाः प्रस्ताव वनेधुंकूगु दु ।

थुकी ग्रे कोट, हाकुगु लाकांया लिसें ह्याउँगु किनारा दुगु हाकुगु सारी धकाः प्रस्ताव वंगु दु । थ्व धइगु हाकु पतासि खः । उकिया नापं थ्व प्रदेशय् तामाङ जातिया नं बाहुल्यता दुगु जुयाः उमिसं पुनीगु ‘श्यामा’ यात नं औपचारिक पोशाक कथं प्रस्ताव छ्वःगु दु ।

अथे हे खस जातिया प्रतीक कथं वँचुगु रंगय् ढाकाया किनारा दुगु सारी सिना वःसां जिउ धइगु प्रस्ताव नं वंगु दु । इच्छा दुपिंसं थःथःगु जातिया पहिचान पिलुइ कथंया वसः पुना वःसां जिउ धकाः नं प्रस्ताव छ्वयागु खँ सभामुख श्रेष्ठं कनादिल ।

मिजंतय् हकय् नं तपाःलं सुरुवाः अथवा थःथःगु जातिया पहिचान पिलुइगु वसः पुना वःसां जिउ धकाः प्रस्ताव याना छ्वःगु दु ।
नियमित न्हि कुन्हु धाःसा ग्रे कोट व हाकुगु लाकां सकसितं अनिवार्य यानाः मिजंतय्सं चाहिँ हाकुगु तपुलि नं अनिवार्य रुपं पुना वयेमाःगु नियम दयेकूगु दु ।

प्रदेशय् सकस्यां तपाःलं सुरुवाः (दौरासुरुवाः) हे न्ह्याना वयेमाः धकाः शुरुइ प्रस्ताव तयार याःगु खःसां अधिकांश सांसदतय्सं तपाःलं सुरुवाः पुनेत अस्वीकार याःगुलिं न्हूकथं प्रस्ताव तयार यायेमाःगु खः ।