मतया ध्यबा पुइकेमाः धाःपिं निम्ह दुजः निष्काशित
येँ ९नेपालभाषा टाइम्स)- नेपाल विद्युत प्राधिकरणया सञ्चालक समितिया निम्ह दुजःत चीकूगु दु । बोर्डया दुजःपिं भक्तबहादुर पुन व कपिल आचार्ययात प्राधिकरणया सञ्चालक समितिं चीकूगु खः ।
उद्योग व्यवसायीतय्त डेडिकेटेड व ट्रंक लाइनया बक्यौता पुइकेमाः धकाः अडान कया वयाच्वंपिं पुन व आचार्ययात ऊर्जा जलस्रोत तथा सिँचाइ मन्त्रालयं बोर्डया दुजःपाखें चीकाछ्वःगु खः । वय्कःपिंत इमेलपाखें चीकागु सम्बन्धी पौ छ्वःगु खः ।
डेडिकेटेड व ट्रंक लाइनया मत छ्यःगु बक्यौता मपूपिं उद्योगया लाइन चाना बिउगु व अज्याःगु उद्योगतय्सं ध्यबा मपूतले लाइन स्वाये मजिउ धकाः अडान कया वयाच्वंपिं थ्व निम्हेसितं वंगु साउन १५ गते लिखित स्पष्टीकरण न्यंगु खःसा उमिसं साउन १८ गते स्पष्टीकरण बिउगु खः । तर स्पष्टीकरण सन्तोषजनक मजू धासें मन्त्री दिपक खड्कां वय्कःपिंत चीकूगु खः ।
आचार्यं सरकारपाखें थःपिंत प्यदँया नितिं नियुक्त याःगु व राज्यया पक्षय् दनाबलय् राज्यं हे अनावश्यक द्वपं बियाः चीकूगुलिं थःपिंत अन्याय जूगु धासें थुकिया विरुद्ध अदालत वनेगु खँ धाःगु दु । वय्कलं नकतिनि थःपिंत पौ वःगु व उकिया अध्ययन लिपा कानुन व्यवसायीलिसे सहलह यानाः अदालत वनेगु खँ कनादीगु दु । वय्कलं थःत प्यदँया नितिं नियुक्त याःगु खःसा दछि ई दनेवं चीकूगुलिं न्यायया नितिं अदालत वनेत्यनागु खँ धयादीगु दु ।
थ्वहे झ्वलय् नेपाल विद्युत प्राधिकरणया कार्यकारी निर्देशक कुलमान घिसिङं मन्त्रीं चीकूपिं सञ्चालक समितिया निम्हं दुजःतय्त म्हिगः च्वंगु सञ्चालक समितिया बैठकय् सःतूगु खः । वय्कःपिं धाःसा थःपिंत सरकारया ठाडो आदेशं चीकूगुलिं बैठकय् उपस्थित धाःसा जुयामदी ।
सरकारं चीकेधुंकूपिं सञ्चालक समितिया दुजःतय्त कार्यकारी निर्देशक घिसिङं बैठकय् सःतूगु खँयात कयाः धाःसा थीथी खँ पिहां वःगु दु । वय्कःया थ्व ज्यायात तप्यंक सरकारयात बिउगु हाथ्या कथं थन विश्लेषण यानाहःगु दु । थ्व स्वयां न्ह्यः नं निर्देशक घिसिङं उद्योगया लाइन तुरुन्त स्वाना बिउ धकाः प्रधानमन्त्री केपी शर्मा ओलीं बिउगु निर्देशनयात नं बेवास्ता यानादीगु खः ।
थ्वहे झ्वलय् सरकारं प्राधिकरणया सञ्चालक समितिइ देवेन्द्र कार्की व महेन्द्रबहादुर गुरुङयात नियुक्त याःगु दु । ऊर्जा, जलस्रोत तथा सिँचाइ मन्त्रालयं मन्त्री स्तरीय निर्णय यानाः प्वनाच्वंगु समितिया दुजलय् कार्की व गुरुङयात नियुक्त याःगु खः ।
न्हू सञ्चालक नियुक्त जूम्ह कार्की ऊर्जा मन्त्रालयया पुलांम्ह सचिव खःसा गुरुङ विद्युत विकास विभागया पुलांम्ह महानिर्देशक लिसें पञ्चेश्वर विकास प्राधिकरणया पुलांम्ह प्रमुख कार्यकारी अधिकृत खः । खाली जूगु निगू सिटय् वय्कःपिंत हःगु खः ।
LEAVE YOUR COMMENTS