ने. सं. ११४४ ञलाथ्व नवमी -

प्रदेश ३ या नां – पुलांगु प्रस्तावत छु जुइ ?

प्रदेश नं. ३ या संसद सचिवालयय् थ्व प्रदेशया नां ‘नेपालमण्डल प्रदेश’ जुइमाः धयागु छगू प्रस्तावलिसें ‘नेवाः–ताम्सालिङ प्रदेश’ व ‘गौरीशंकर प्रदेश’समेत यानाः स्वंगू अलग अलग प्रस्ताव हे दर्ता जुयाच्वंगु दु । आः सत्तारुढ दल नेकपां प्रदेशयानां मेगु हे तयेगु धकाः निर्णय याःगु कारणं संसदय् दर्ता जुयाच्वने धुंकूगु थ्व प्रस्ताव छु जुइधइगु न्ह्यसः पिहां वःगु दु । संसदीय प्रक्रियाकथं दर्ता जुयाच्वने धुंकूगु थ्व प्रस्तावयात सदनया बैठकय् प्रस्तुत यानाः मतदान याकेमाः । यदि थ्व प्रस्तावत असफल जुल धाःसा जक मेगु प्रस्तावयात कयाः मतदान जुइ । मतदान मयाकेगु खःसा थ्व प्रस्ताव सुनां दर्ता याःगु खः वं हे थःगु प्रस्ताव लित कायेमाः ।

आः तक बागमति प्रदेश तयेमाः धइगु प्रस्ताव संसदय् दर्ता मजूनि । थ्व नेकपाया आन्तरिक निर्णय जक खः । पार्टीं गुगु नांया निर्णय याःगु खः, थ्व नां संसदय् दर्ता जुयाच्वंगु मदु । यदि न्हापा दर्ता जुयाच्वंगु प्रस्तावतय्त वास्ता हे मयासे छक्वलं थ्वहे नांयात सदनय् यंकल धाःसा थ्व संसदीय व्यवस्थाया अःखःजुइगु दावी सूत्रं याःगु दु ।

प्रदेश ३ या सभामुख सानु श्रेष्ठं बागमति प्रदेश धइगु प्रस्ताव आःतक संसदय् मवःनि धासें संसदीय प्रक्रियाकथं छु छु प्रस्ताववःगु खःउकियात कयाः जक कारवाही जुइ धयादीगु दु । अथे हे प्रदेश ३ या कानून व्यवस्थामन्त्री शालिकराम जमरकट्टेलं नं बागमति प्रदेशया नां दर्ता यायेत छगू निश्चित प्रक्रियां वयेमाः धासें आःतक उगु प्रक्रियाय् थ्व नां दुहां मवःनिगु खँ कनादीगु दु ।

मेखे प्रदेशया नां व स्थायी राजधानीबारे नेकपां निर्णय यायेवं प्रदेश ३ या सदन च्वनेगु तयारी नं शुरु जूगु दु । आः नामाकरण बारे छु प्रक्रियां न्ह्याःवनेगु धकाः राज्य व्यवस्था समितिं कार्यविधि तयार यायेत्यंगु खँ सीदुगु दु ।