एकीकृत पार्टीया चुनाव चिं ‘सूर्य’

येँ – याकनं हे एकीकरण जुइत्यंगु एमाले व माओवादी केन्द्र एकता जुइधुंकाः न्हूगु पार्टीया चुनाव चिं ‘सूर्य’ जुइगु खँय् सहमति कायम जूगु दु । पार्टी एकता संयोजन समितिया म्हिगः च्वंगु बैठकय् थ्व सहमति जूगु खः ।

थ्व बाहेक ल्यं दनिगु मेमेगु विषयय् निर्णय यायेगु जिम्मा धाःसा निगुलिं पार्टीया शीर्ष नेतातय्त बिउगु दु । मेमेगु विवादया विषययय् निर्णय यायेगु जिम्मा शीर्ष नेतातय्त बिउसां चुनाव चिंया विवाद धाःसा आः समाधान जूगु खँ धाःगु दु । थ्व स्वयां न्ह्यः एमालें सूर्य व माओवादीं ‘सूर्य दुने इंचामुगः’ दुगु चिं तयेमाः धकाः अडान काःगु खः । थौंकन्हय् एमालेया चुनाव चिं ‘सूर्य’ व माओवादी केन्द्रया चुनाव चिं ‘गोलाकार दुने इंचामुगः’ जुयाच्वंगु दु ।

थ्व धुंकाः आः निगू दल एकीकरण जुइधुंकाःया राजनीतिक सिद्धान्त, अन्तरिम विधान, केन्द्रीय समितिया गठन, पार्टी एकता यायेगु मिति, पार्टीया विधानय् ‘जनयुद्ध’ धइगु खँग्वः तयेगु वा मतयेगु धइगु निर्णय याये ल्यं दनि । थुपिं खँय् विवाद जुयाः माओवादी केन्द्रया अध्यक्ष पुष्पकमल दाहाल वंगु खाइ संल्हू कुन्हु वार्ता मयासे सपरिवार चाःहिउ वना बिउगु खः । व स्वयां न्ह्यः प्रधानमन्त्री लिसें एमालेया अध्यक्ष केपी ओली भारत भ्रमणय् झाःगुलिं नं एकता वार्ता लिबाः वंगु खः ।

निगू पार्टीया एकता थ्वहे वइगु वैशाख ९ गते नेपाल कम्युनिष्ट पार्टीया बुन्हि कुन्हु लाकाः यायेगु धकाः एकता संयोजन समितिं सिफारिस याःगु दुसां अझ हे गुलिखे खँ मिले याये ल्यं दनिगु जुयाः वकुन्हु एकता जुइली शंका जुयाच्वंगु दनि । मिले मजूगु खँ मिले यायेत म्हीग निगुलिं दलया शीर्ष नेतातय् वान टु वान बैठक च्वंगु खःसा म्हिगः सुथंनिसें कार्यदलया बैठक च्वनाः मिले मजूगु छुं खँ मिले याःगु खः । मेगु खँ मिले यायेगु जिम्मा हानं शीर्ष नेतातय्त हे बिउगु दु ।

सम्बन्धित बुखँ

LEAVE YOUR COMMENTS