दरवार हाइस्कुल पुनःनिर्माणया निंतिं शिलान्यास
येँ- देय्या दकलय् पुलांगु शैक्षिक संस्था दरवार हाइस्कुल (भानु मावि)या जग शिलान्यास याःगु दु । नेपाःया आधुनिक शिक्षाय् अग्रणी शैक्षिक संस्था नापं देय्या हे दकलय् पुलांगु विद्यालय दरवार हाइस्कुल पुनःनिर्माणया निंतिं शिलान्यास याःगु खः ।
वि.सं. १९१० सालय् राणातय् मस्तय्त जक आखः ब्वंकेगु ल्याखं तत्कालीन प्रधानमन्त्री जंगबहादुर राणाया पालय् उगु स्कुल स्थापना याःगु खः । देय्या हे दकलय् न्हापांगु स्कुलया संचालन जूगु दरवार हाइस्कुलय् आखः ब्वनेत नं राणा प्रधानमन्त्रीं इच्छा याःपिंसं जक शिक्षा कायेगु अवसर दइगु खः । २००७ सालय् देशय् प्रजातन्त्र वयेधुंकाः उगु विद्यालयय् जनताया मस्तय्सं नं आखः ब्वनेगु अवसर प्राप्त जूगु खः ।
२०७२ साल गोरखा केन्द्र विन्दु जुयाः वःगु तःभुखाचय् लानाः क्षति ग्रस्त जूगु विद्यालय स्वदँ लिपा पुनःनिर्माणया निंतिं वंगु शुक्रवाः छगू ज्याझ्वःया दथुइ शिलान्यास याःगु खः ।
चीनया ग्वाहालिइ पुनःनिर्माण जुइत्यंगु विद्यालयया शिलान्यास शिक्षा, विज्ञान व प्रविधिमन्त्री गिरिराजमणि पोखरेल व नेपाःया निंतिं चिनिया राजदूत यु होंगं मंकाः कथं छगू ज्याझ्वःया दथुइ शिलान्यास यानादीगु खः । भुखाय् ब्वये न्ह्यः संस्कृति मा वि नं संचालन जुयाच्वंगु दरवार हाइस्कुल भुखाचं क्षति जुइवं निगुलिं विद्यालय वाल्मिकी विद्यापीठया भवनय् प्रि–फ्याबय् संचालन जुया वयाच्वंगु खः ।
करिब ९ रोपनी जग्गाय् निर्माण जुइगु स्कुल भवन प्यतँया जुइ । करिब दत्याया दुने निर्माण सम्पन्न यायेगु लक्ष्य कयातःगु स्कुल भवन निर्माणया निंतिं ८० करोड लागत तुइगु अनुमान यानातःगु दुसा उकी ४० कू कक्षा क्वथा दइ ।
पूर्णरुपं चीन सरकारया ग्वाहालिइ निर्माण जुइगु हाइस्कुल निर्माणया ज्या चिनिया निर्माण कम्पनी सांघाई कन्स्ट्रक्सनं याइगु जूगु दु । चीन सरकारं तःभुखाचं अति प्रभावित झिंप्यंगुलिं जिल्लाय् व मेगु स्वंगू जिल्लाय् छगू छगू विद्यालय पुनःनिर्माणया निंतिं याःगु सहमति कथं दरवार हाइस्कुल पुनःनिर्माण यायेत्यंगु खः ।
LEAVE YOUR COMMENTS