सत्तारुढ सांसदत नं विरोधय्

गुथि विधेयक विरुद्धया संघर्ष

येँ – सरकारं हःगु गुथि सम्बन्धी विधेयकयात स्वनिगःया सत्तारुढ सांसदतय्सं नं विरोध याःगु दु । म्हिगः नरदेवी श्री श्वेतकाली संरक्षण तथा व्यवस्थापन समितिं याःगु थ्व सम्बन्धी छगू ज्याझ्वलय् सत्तारुढ दलया सांसदपिंसं गुथि विधेयकयात कयाः विरोध याःगु खः । ज्याझ्वलय् सांसदतय्सं विधेयक पारित जुइगु सम्भावना दु धासें थःपिंसं जक संसदय् न्ववानाः विधेयकयात दिके मफइ व दिकेगु खःसा सतक आन्दोलन यायेमाः धयादीगु दु ।

सांसदपिंसं सरकारं आइतवाः थें दमन यात धाःसां अवस्था गम्भीर जुइ फइगु ख्याच्वः बिसें सरकारं दमन यानाच्वन धाःसा थःपिं नं सतक आन्दोलनय् कुहां वयेमालीगु खँ धाःगु दु । सांसद जीवनराम श्रेष्ठं विधेयक हःगुया लिउने तःधंगु षडयन्त्र महसुस जूगु धासें सरकारं बांलाःगु विधेयक हल धकाः भ्रमय् दयेफु, किसान व मोहीया हितय् विधेयक हल धकाः भ्रमय् च्वनाच्वन जुइ, तर सरकार गलत दिशापाखे वनाच्वंगु दु धयादिल ।

वय्कलं गुथि लिसे सम्बन्धित नेवाः पहिचान व संस्कारयात वेवास्ता यानाः विधेयक हःगु द्वपं नं बियादिल । वय्कलं थःगु पार्टी सत्तारुढ जुयाच्वंगुलिं थःपिंसं विधेयकया विरोधय् न्ववाइमखु धइगु भ्रम ब्वलनाच्वंगु धासें विधेयक नेवाः पहिचान मदयेकेगु व ठेकेदार प्रथा कायम याकेत स्वःगु द्वपं नं बियादिल ।

वय्कलं विधेयक संशोधन मखुसें लित कायेमाःगु माग यानादिल । वय्कलं विधेयक लित मकाल धाःसा सदन व सतकय् वयाः आन्दोलनय् ब्वति कायेगु खँ कनादिल । संघीय समाजवादी पार्टी नेपालया सहअध्यक्ष लिसें सांसद राजेन्द्र श्रेष्ठं सदनं आः जबर्जस्ती विधेयक पारित जुइगु प्रवत्ति अप्वया वनाच्वंगु धासें सतक संघर्षया विकल्प मदुगु खँ कनादिल ।

वय्कलं विधेयक संविधान अःखः जूगु धासें उकियात भिंकेत सतक संघर्षया विकल्प मदुगु खँ कनादिल । वय्कलं संविधान अःखः वःगु थ्व विधेयक नेवाःतय् जक मजुसें नेपाःया पहिचान व आस्थाय् हे प्रहार जूगु व नेपाःया संस्कृतिइ हे अतिक्रमणया पराकाष्ठा जूगु दु धयादिल ।
अथे हे पुलांम्ह रक्षामन्त्री लिसें नेकां सांसद भिमसेनदास प्रधानं विधेयक विरुद्ध सत्तापक्षं प्रतिपक्ष सुम्क च्वनी धकाः थुइकाच्वंगु जुइफु, सरकारं पेले यानाः विधेयक पास यायेत स्वल धाःसा मि च्याइगु ख्याच्वः बियादिल ।

उकथं हे नेकपाया सांसद रामवीर मानन्धरं सरकारं थ्व विधेयक लित यंकेगुया विकल्प मदु धासें आः तक प्रधानमन्त्री जूपिं नेतात येँय् डेराय् च्वनाः सत्ताय् थ्यंपिं खः धासें आः सत्ता कब्जा लिपा आः संस्कार व संस्कृतिइ आक्रमण याःगु द्वपं बियादिल । वय्कलं धयादी, ‘सरकारं विधेयक लित कायेमाः वा सरकार हे लिहां वयेमाः । जिपिं पार्टीइ ला दइ, तर जिमि अबु बाज्यां दयेकातःगु गुथि मदयेकेत स्वल धाःसा जिपिं सुम्क च्वने मखु ।’

असनय् विधेयक च्याकल
थ्वहे झ्वलय् गुथि विधेयकयात कयाः म्हिगः नेवाः राष्ट्रिय मुक्ति मोर्चां विरोध ¥याली याःगु दु । असनं शुरु जूगु ¥याली भोताहिति, रत्नपार्क सहिदगेट, न्हू सतक, जुद्ध सालिक वंघः जुयाः असनय् वयाः सभाय् हिउगु खः । उगु सभाय् देशभक्त जनगणतान्त्रिक मोर्चाया नेता सीपी गजुरेल, आदिवासी जनजाति महासंघया पुलांम्ह नायः ओम गुरुङ व नेवाः राष्ट्रिय मुक्ति मोर्चाया नायटः पवनमान श्रेष्ठपिंसं न्ववानादीगु खःसा सभा लिपा गुथि विधेयक २०७५ च्याकेगु ज्या जूगु खः ।

अथे हे गुथि विधेयकयात कयाः केन्द्रीय मानन्धर संघं छगू प्रेस विज्ञप्ति जारी यासें विधेयकयात कयाः भत्र्सना याःगु दु । संघया सचिव गजेन्द्र मानन्धरं हस्ताक्षर यानाः पिकाःगु विज्ञप्तिइ विधेयकं नेपाःया सांस्कृतिक धरोहरयात हस्तक्षेप याःगु धासें उकियात तत्काल खारेज यायेमाःगु माग यानातःगु दु ।

सम्बन्धित बुखँ

LEAVE YOUR COMMENTS