उद्धारय् कमजोरी जुल– ओली, सिइक सिइकं तयारी मयाः– दाहाल

येँ (नेपालभाषा टाइम्स)÷ प्रधानमन्त्री केपी शर्मा ओलीं सरकारी तयारी स्वयां तःधंगु विपत्ति वःगुलिं उद्धार व मालेज्याय् कमजोरी जूगु खँ स्वीकार यानादीगु दु । म्हिगः सिंहदरबारस्थित प्रधानमन्त्री तथा मन्त्रिपरिषदया कार्यालयं ग्वसाः ग्वःगु पत्रकार सम्मेलनय् वय्कलं उगु खँ धयादीगु खः । लिसें वय्कलं वइगु इलय् थज्याःगु कमजोरीयात भिंकेगु प्रतिबद्धता नं प्वंकादीगु दु ।

उकथं हे वय्कलं थ्व इलय् जनतां फयाच्वंगु पीडायात राष्ट्रिय पीडा नालाः मालेज्या, राहत व ग्वाहालिया निंतिं इनाप नं यानादीगु दु । वय्कलं राज्य व समाज लिसे दुगु स्रोत, साधनया छ्यलेमाःगु खँ धासें उगु इनाप यानादीगु खः ।

पत्रकार सम्मेलनया झ्वलय् प्रधानमन्त्री ओलीं धयादिल, ‘थ्व सरकारया जक मखु, मुक्कं समाजया दुःखया विषय खः । झी सकलें विपद्या घटनां दुखित जुयाच्वनागु दु । गुलिखे संरचनागत त्रुटीया कारणं
क्षति जूगु दु । वइगु इलय् संरचना दयेकेबलय् विपद्या सामना यायेफइ कथं दीर्घकालीन रुपं सबल संरचना दयेकेगु जुइ ।’

थ्वहे झ्वलय् माओवादी केन्द्रया अध्यक्ष पुष्पकमल दाहालं न्ह्यः हे मौसम पूर्वानुमान जुइक जुइकं नं सरकार विपद् व्यवस्थापनया तयारी व प्रतिकार्यया ज्या यायेमफुगुलिं क्षतिया मात्रा अप्वःगु खँ धयादीगु दु । माओवादी केन्द्रं न्ह्याकूगु स्वयंसेवक परिचालन अभियान येँ बल्खुया सुकुम्बासी बस्तीइ उलेज्या यासें वय्कलं उगु द्वपं बियादीगु खः ।

उकथं हे अध्यक्ष दाहालं प्राकृतिक विपत्तिइ लाःपिं नागरिकया निंतिं राहत, पुनस्र्थापना व पुनर्निर्माणया नितिं सत्ता पक्ष व विपक्ष मधासे आम जनता लिसे जानाः राहत व पुनस्र्थापना यायेगु ज्याय् न्ह्यज्यायेत इनाप नं यानादीगु दु । लिसें वय्कलं विपद् व्यवस्थापनय् जूगु कमजोरीया गम्भीर समीक्षा यासें राहत, पुनस्र्थापना व पुनर्निर्माणया ज्या युद्धस्तरं न्ह्याकेत इनाप नं यानादीगु दु ।