जेठंनिसें फोहोर वाके मबीगु ख्याच्वः

येँ (नेपालभाषा टाइम्स)- बञ्चरेडाँडा ल्याण्डफिल साइटय् हानं फोहोर वाके मबीगु ख्याच्वः स्थानीय वासिन्दातय्सं बिउगु दु । बञ्चरेडाँडा ल्याण्डफिल्ड साइट प्रभावित क्षेत्र सरोकार समितिं आः वइगु बैशाख तक थःपिनि माग पूमवंकल धाःसा वइगु जेठंनिसें फोहोर वाके मबीगु ख्याच्वः बिउगु खः । सरोकार समितिया संयोजक श्रीराम ढुंगाना व उपसंयोजक सनत उप्रेतीं मंकाः रुपय् प्रधानमन्त्री तथा मन्त्रिपरिषद् कार्यालय, सहरी विकास मन्त्रालय व येँ महानगरपालिकायात पौ च्वयाः उगु ख्याच्वः बिउगु खः ।

मंकाः कथं जारी याःगु पतिइ धयातःगु दु, ‘सरकार व फोहोर मैला विसर्जन याइगु फुक्कं पक्षं उगु क्षेत्रया नागरिकया स्वच्छ वातावरणय् म्वाये दइगु मौलिक हक, अधिकार हनन याःगु व भविष्यय् थ्व लागाय् आम नरसंहार जुइफइगु गम्भीर मामिलाय् सरकारी पक्षं न्ह्याबलें बेवास्ता यानाः राज्य शक्तिया दुरुपयोग यासें दमन चक्रपाखें स्वनिगःया फुक्कं फोहोर वायेगु दुष्प्रयास जारी यानातःगुलिं अज्याःगु घृणित ज्यायात जिमिसं विरोध यानाच्वना ।’

उकथं हे पतिइ प्रभावित क्षेत्रय् मानववस्ती रहित क्षेत्र कायम यायेत वा फोहोरमैला निषेधित क्षेत्र यायेगु धइगु सन्दर्भय् सरकार व सम्बद्ध पक्ष स्थानीय निकायं वैशाख मसान्त दुने सरकारया धारणा सहित पत्याः यायेबहः जुइक प्रक्रिया मन्ह्याकल धाःसा स्थानीय बासिन्दापाखें २०८० जेठ १ गते निसें उगु लागाय् फोहोर यंकेगु ज्या न्ह्याबलेंया नितिं पूर्ण रुपं पनेगु ख्याच्वः नं बिउगु दु ।