राजोपाध्याय समाजया स्वंगुलिं जिल्लाय् समन्वय समिति

येँ – राजोपाध्याय समाजं स्वनिगःया स्वंगुलिं जिल्लाय् समन्वय समिति गठन यायेगु झ्वलय् येँ जिल्ला समन्वय समिति गठन याःगु दु । नेवाः समुदाय दुने सनातनी धर्मावलम्बितय् पुरोहित कथं कयातःपिं राजोपाध्याय समुदायया समाजया येँ जिल्ला समिति गठन याःगु खः ।

येँय् च्वंपिं समाजया दुजःपिनिगु छगू भेलां विरु सुवेदी राजोपाध्यायया संयोजकत्वय् न्हय्म्हेसिया येँ जिल्ला समन्वय समिति गठन याःगु खः । सर्वसम्मत रुपं ल्यःगु समितिइ सुजित राजोपाध्याय छ्यांजे व विभुषा राजोपाध्याय दांभरिंलय् च्वनादीगु दु । अथे हे दुजलय् विद्या राजोपाध्याय, राजीव राजोपाध्याय, लूजः राजोपाध्याय व सुरभी राजोपाध्याय च्वनादीगु खः ।

भेलाय् नव्य न्यायाचार्य उपेन्द्रभक्त सुवेदी (गोविन्द भक्तानन्द राजोपाध्याय), अर्थविद् लक्ष्मणराज राजोपाध्याय, नापी विभागया पुलांम्ह महानिर्देशक रविनकाजी शर्मा राजोपाध्यायं समाजया समाजयात अझ क्वतुक व सशक्त रुपं न्ह्यःने यंकेत सामाजिक रुपं संगठित जुयाः शैक्षिक, आर्थिक रुपं सक्षम याना यंकेमाःगु खँय् बः बियादिल ।

समाजया येँ कचा गठन याये न्ह्यः यल व ख्वपय् नं उकथं समन्वय समिति गठन याःगु खः । ख्वपय् जूगु मुँज्यां बन्दना शर्मा राजोपाध्यायया संयोजकत्वय् गुम्हेसिया समिति गठन याःगु खः । ख्वप समितिइ छ्यांजे माधुरी शर्मा राजोपाध्याय, दांभरिं विजया शर्मा राजोपाध्याय च्वनादीगु दुसा दुजलय् गिरिश शर्मा राजोपाध्याय, स्वस्तिका राजोपाध्याय, चेतनराज राजोपाधयाय, रसिक राजोपाध्याय, मिला राजोपाध्याय, प्रितमराज राजोपाध्याय च्वनादीगु दु ।

अथे हे उद्धव आचार्य राजोपाध्याय संयोजकत्वय् नीस्वंगु न्हय्म्हेसिया यल जिल्ला कमिटिइ त्रिलोचन राजोपाध्याय छ्यांजे, रुविना राजोपाध्याय दांभरि जुयादीगु दु । दुजलय् महेशबाबु राजोपाध्याय, विजेश राजोपाध्याय, बुनु शर्मा राजोपाध्याय व नीरज राजोपाध्याय च्वनादीगु दु ।