पुलांम्ह भैरवयात राष्ट्रपति भण्डारीपाखें भिक्षादान

येँ (नेपालभाषा टाइम्स)- नकतिनि प्रव्रज्याभिषेक (बन्दे छुइगु) ज्या जूम्ह पुलांम्ह श्री भैरव भाजु रुजन शाक्ययात राष्ट्रपति विद्यादेवी भण्डारीं भिक्षादान याना–दीगु दु । म्हीग राष्ट्रपति भवन शितल निवासय् राष्ट्रपति भण्डारीं भाजु शाक्ययात भिक्षादान यानादीगु खः ।

यँयाःबलय् रथयात्रा याइपिं पुलांपिं श्री गणेश व श्री भैरवया प्रव्रज्याभिषेक जुइबलय् वय्कःपिंसं राष्ट्राध्यक्षया ल्हतिं नं भिक्षा कायेमाःगु परम्परा दु । गुथि संस्थानया लगतय् थ्व खँ नं उल्लेख जुयाच्वंगु दुसा न्हापा जुजु दुबलय् नं अथे याःगु दसुत दु । तर दथुइ थ्व परम्परा त्वाःदः वंगु खःसा आः हानं पुलांगु परम्परायात म्वाकाः राष्टाध्यक्षपाखें भिक्षादान यायेगु ज्या जूगु खः ।

प्रव्रज्याभिषेक जुइबलय् बन्दे छूम्ह कुलपुत्रं प्यन्हु तक चिवर पुनाः म्होतिं नं न्हय्खा छेँय् भिक्षाटन यायेमाःगु परम्परा दु । वहे परम्परा कथं भाजु रुजन शाक्य म्हीग राष्ट्रपति भवन झाःगु खः ।

उगु इलय् राष्ट्रपति विद्या भण्डारीं पुलांम्ह श्री भैरव रुजन शाक्य लिसें इतुम्बहाः (केशचन्द्र कृत पारावत महाविहार) या चक्रेश्वर व विहारया अध्यक्षयात मत दान यानादीगु खः । लिसें भाजु शाक्ययात जाकि व ३४ गः गुलुपातय् थीथी बीबः व थीथी ज्वलं तयाः नं दान यानादीगु खः । अन्त्यय् नापं वंपिं झिम्ह थाय्पापिंत नं दक्षिणा दान यायेगु ज्या जूगु खः । थ्व फुक्कं ज्याझ्वः बौद्ध परम्पराकथं जूगु खः ।

इतुम्बहालय् वंगु विहीवाः भाजु रुजन शाक्ययात थाकुलि दयेकाः ४० म्ह शाक्य कुलपुत्रपिंत चुडाकर्म यायेगु ज्या जूगु खः । भैलःद्यःया आसनं कुहां वयेधुंकाः जूगु थ्व वय्कःया न्हापांगु सामाजिक संस्कार खः ।