ने. सं. ११४६ बछलागा षष्ठी -

चिभालय् तयातःम्ह बुद्ध खुयायंकल

येँ (नेपालभाषा टाइम्स)- यलया सुनकोथिइ च्वंगु ऐतिहासिक चीभालय् तयातःगु बुद्धया मूर्ति खुया यंकूगु दु । सुनाकोथिया चीभाःलाछिइ च्वंगु चीभालं मूर्ति खुया यंकूगु खः । स्थानीय मनूतय्सं धाः कथं वंगु चान्हय् चीभाः हे तछ्यानाः अन तयातःगु बुद्धया मूर्ति खुया यंकूगु खः । चीभाः अनया मू लँपुइ हे लानाच्वंगु खःसां चान्हय् खू वःगु धाःसा सुनानं मखंगु खः ।

स्थानीय मनूतय् धापू कथं थ्व चीमाः सम्राट अशोकं दयेकूगु खः । उकिं थ्व तसकं पुलांगु चीभाः खः । थ्वहे चीभाःया कारणं थ्व लाछिया नां हे चीभाःलाछि जूवंगु खः ।

ऐतिहासिक चीभाःया प्यखेरं चिचीधंगु देगःचा दनाः उकिया द्यःने पञ्चबुद्ध पलिस्था यानातःगु खः । उकी मध्ये छम्ह बुद्धया देगः हे थुनाः द्यः खुया यंकूगु खः । द्यः खुया यंकूगु बारे स्थानीय मनूतय्सं प्रहरीयात उजुरी यायेधुंकूगु दु ।