ख्वप अस्पताल भवनया जग स्वने ज्या
ख्वप – ख्वप नगरपालिकां दयेकेत्यंगु ख्वप अस्पतालया जग स्वनेगु ज्या जूगु दु । नेमकिपाया अध्यक्ष नारायणमान बिजुक्छेँ अस्पताल भवनया जग स्वनादीगु खः । च्याम्हसिंहस्थित ख्वप नगरपालिका भवनया उत्तरी लागाय् करिब १० रोपनी जग्गाय् अस्पताल दयेकेत्यंगु खः ।
अस्पताल भवनया जग स्वनादिसें ज्याझ्वः मूपाहां बिजुक्छें देशय् छक्वलं हिउपाः हये फइमखु धासें सरकारं ध्यान बिउसां मबिउसां स्थानीय जनताया सेवा सुविधाया निंतिं ख्वप कलेजया स्थापनाकालंनिसें हे ख्वप अस्पतालया अवधारणा नं न्ह्यःने हयाच्वनागु खँ कुलादिल ।
थनिं पीदँ न्ह्यः ख्वप अस्पतालय् तयेथाय् मदयेक झाडाबान्ताया ल्वगित अप्वयाः फोहर जूगु अस्पतालय् थःपिंसं सफाइ अभियान न्ह्याकागु खँ लुमंकादिसें वय्कलं छुं सुधार जुया वयाच्वंगु ख्वपय् आः थःपिनिगु अस्पताल चायेके त्यनागुलिं थुकिं ख्वपया जनतायात थप सुविधा प्राप्त जुइगु विश्वास प्वंकादिल ।
ज्याझ्वलय् नेमकिपाया सचिव नापं सांसद प्रेम सुवालं ६० प्रतिशत वासः पिनें हयेमाःगु व नेपालय् उत्पादन जूपिं ६० प्रतिशत नर्स पिने वनेगु यानाच्वंगुलिइ आः ख्वप अस्पताल चायेकाः नमूनाया रुपय् न्ह्यःने हयेमाःगु स्पष्ट यानादिल । ख्वप नगरपालिकाया प्रमुख सुनील प्रजापतिं सरकार व विदेशी दातृ संस्थाया आर्थिक ग्वाहालि मकासे थःपिनिगु हे आन्तरिक आयस्रोतं अस्पताल निर्माण यायेगु जुइ धासें वय्कलं ४५ गू करोड तकां ख्वप अस्पताल निर्माण यायेत्यनागु जानकारी बियादिल ।
२५ श्ययाया अस्पतालय् एक्सरे, सिटी स्क्यान, आकस्मिक, अल्ट्रासाउण्ड, एमआरआई, प्याथोलोजी, प्रसूती, सघन व शल्यक्रिया विभाग नं दइगु नगरपालिकां जानकारी बिउगु दु । भवनया क्वय् पार्किंग व शवगृह नं दइगु अस्पतालया निंतिं नगरपालिकां चालु आर्थिक दँय् १४ गू करोड विनियोजन याःगु दु ।
न्यातँजाः जुइगु अस्पताल वइगु स्वदँया दुने निर्माण सम्पन्न यायेगु लक्ष्य कयातःगु दु । अस्पतालया जग स्वनेगु ज्याय् सांसद सृजना सैंजू, उपप्रमुख रजनी जोशी, ख्वप नपाया पुलांम्ह कार्यकारी अधिकृत रोहितराज पोखरेल, नेपाली सेनाया उपरथी भरत खड्कापिंसं नं थःथःगु नुगःखँ तयादीगु खः ।
LEAVE YOUR COMMENTS