पशुपति कोषया ख्याच्वः

येँ (नेपालभाषा टाइम्स)-पशुपति क्षेत्र विकास कोषं पशुपति क्षेत्र दुने तयातःगु फुक्क हे पसः कवः व पार्किङतय्त पुले मानिगु हिसाब किताब ज्वनाः ध्यबा बुझे याः वा धकाः पौ च्वःगु दु । यदि आः वइगु न्हय्न्हुया दुने बक्यौता मपुल धाःसा सरकारी बाँकी सरह असुल उपर यायेगु खँ नं कोषं धाःगु दु ।

कोषं वंगु फागुन २४ गते सुइन्यान्हुया ई बियाः बक्यौता पुलेत धाःगु खः । उगु ईया नं सम्झौता कथं पुलेमाःगु बाः लिसें बक्यौता मपूपिनिगु हकय् थप न्हय्न्हुया म्याद बियाः म्हिगः सुचं पिकाःगु खः ।

न्हय्न्हुया दुने नं बक्यौता मपुल धाःसा पसः कवः व पार्किङ सञ्चालकतय्त हाकुगु धलखय् तयाः सम्बन्धित थाय्या चल अचल सम्पत्ति जफत जुइगु व सरकारी बाँकी सरह असुल यायेगु ख्याच्वः नं कोषं बिउगु दु ।