लामिछानें सहकारीया ध्यबा अपचलन याःगु ठहर
येँ (नेपालभाषा टाइम्स)÷सहकारी ठगी सम्बन्धी संसदीय छानबिन विशेष समितिं गोर्खा मिडिया नेटवर्कया तत्कालीन प्रबन्ध निर्देशक लिसें पुलांम्ह गृहमन्त्री रवि लामिछानें सहकारीं वःगु ध्यबा अपचलन याःगु ठहर यासें कारबाहीया सिफारिस याःगु दु ।
सहकारीपाखें ध्यबा गोर्खा मिडियाय् हःगु ६५ करोड ५४ लाख तका ध्यबा जीबी राई व रवि लामिछानें चेक च्वयाः खर्च याःगु खँ समितिं म्हिगः सभामुख देवराज घिमिरेयात लःल्हाःगु प्रतिवेदनय् न्ह्यथनातःगु दु ।
कम्पनीया अध्यक्ष जीबी राई, प्रबन्ध निर्देशक लामिछाने व सञ्चालक छविलाल जोशीं केवाईसी फर्म भरे यानाः हस्ताक्षर यायेगु लिसें निगू बैंकय् मंकाः एकाउन्ट चले यानाच्वंगु नं छानबिनया झ्वलय् पुष्टि जूगु दु । समितिं छानबिनया झ्वलय् लामिछाने दोषी जुइगु आपालं प्रमाण नं लुइकूगु खँ धाःगु दु ।
उकथं हे लामिछानें गोर्खा मिडिया नेटवर्क प्रालिइ न्याःगु शेयर नं किर्ते भ्वं दयेकाः न्याःगु निष्कर्ष समितिं पिकाःगु दु । समितिं शेयर न्यायेगु लिसें साधन, उपकरण न्यायेगु झ्वलय् किर्ते याःगु धासें माःगु कानुनी प्रबन्ध यायेत सरकारयात सिफारिस याःगु दु ।
समितिया प्रतिवेदनय् गोर्खा मिडिया नेटवर्क प्रालि लगायत कम्पनीइ शेयर न्याये–मीगु झ्वलय् कानुन कथं पेश जुइमाःगु भुक्तानीया साधन व उपकरणत पूर्ण मजुसे किर्ते भ्वंया आधारय् न्याये–मी याःगुलिं उकिया समेत छानबिन यायेत सिफारिस यानातःगु दु ।
थ्वहे झ्वलय् रास्वपाया नेतातय्सं धाःसा समितिं थज्याःगु सिफारिस याःसां नं पार्टी अध्यक्ष रवि लामिछानेयात क्लिन चिट् प्राप्त जूगु दु धकाः प्रतिक्रिया बियाहःगु दु ।
LEAVE YOUR COMMENTS