
येँ (नेपालभाषा टाइम्स)-येँया सिडिओ कार्यालयं नेपाल संवत् तयाः दर्ता याये यंकूगु नेवाः संस्थायात दर्ता मयासे लित छ्वया हःगु दु । लुमंकेबहः जू, नेपाल संवत्यात सरकारं राष्ट्रिय संवत् घोषणा यासें आः फुक्कं सरकारी दस्तावेजय् नेपाल संवत् नं छ्यलेगु धकाः निर्णय याना तयेधुंकूगु दु ।
संस्थाया लोगोय् नेपाल संवत् तया हल धकाः सिडिओ कार्यालयं दर्ता मयासे लित छ्वया हःगु खः । येँ मनपा २३ वडाया ओमबहाःत्वाः मिसा पुचः दर्ता याः वंबलय् संस्थाया लोगोय् च्वंगु नेपाल संवत् चीकेगु ज्या सिडिओ कार्यालयं याःगु खः ।
संस्थाया अध्यक्ष सजनी महर्जनं कनादीकथं थःपिनि संस्थाया लोगोय् स्थापना मिति कथं ‘विक्रम संवत् २०८१ व नेपाल संवत् ११४४’ धकाः तया यंकूगु खः । सिडिओया कर्मचारीं विक्रम संवत् जक तयेकाः नेपाल संवत् धाःसा लिकायेके बिउगु खः । नेपाल संवत् लिकाःगु खँय् प्रतिवाद यासें नायः महर्जनं ‘थ्व ला नेपाल सरकारं हे मान्यता बीधुंकूगु खः, छाय् लिकायेगु ?’ धकाः न्ह्यसः तःबलय् कर्मचारीं ‘नेपाल संवत् तयेगु खःसा दर्ता जुइ मखु’ धकाः लिसः बिउगु खः । संस्था दर्ता मजूगुलिं लोगोय् तयातःगु नेपाल संवत् चीकाः तिनि दर्ताया लागिं बियाथकागु खँ नं महर्जनं कनादिल ।
सिडिओ कार्यालयया कर्मचारी– तय्सं संस्थाया नामय् दुगु ‘मिसा व ‘पुचः’ या अर्थ छु खः धकाः नं न्यनेकने याःगु खः । वय्कलं अर्थ थुइका बीवं उकियात धाःसा स्वीकृत याःगु खँ कनादीगु दु ।
लुमंकेबहः जू, सिडिओ कार्यालयं थ्व स्वयां न्ह्यः नेवाः नां तया हःगु संस्थायात नं दर्ता मयासे लित छ्वयेगु यानाच्वंगु खः । छुं ई न्ह्यः तक नं नेवाः नां दुगु संस्था दर्ता याये मखु धकाः अनया कर्मचारीतय्सं कचकच याःगु खः । येँया पुलांगु संस्था ‘नेवाः नुगः’ या नामं संस्था दर्ता याःवंबलय् तकं कर्मचारीतय्सं ‘नेवाः नुगः’ यात अनुवाद यानाः तया हजि धकाः आलताल याःगु खँ उकिया दुजःतय्सं धाःगु दु । लिपा ल्वानाः तिनि संस्था दर्ता याके खन ।
सिडिओ कार्यालयया सहायक सिडिओ व मेपिं कर्मचारीतय्सं नेवाः नां दुगु संस्थायात दर्ता मयाकूगु खँयात कयाः थीथी इलय् सिडिओ लिसें गृह मन्त्रीयाथाय् समेत डेलिगेशन वनाः धायेगु ज्या जुइधुंकूगु दु । अन नेपाली शब्दकोशय् दुगु नां बाहेक मेगु नामं संस्था दर्ता मयाकेगु धकाः नीतिगत निर्णय यानातःगु दु । थ्व नीतिगत निर्णय हे खारेज यायेमाःगु माग भाषाह्यमितय्सं यानाच्वंगु दु ।
LEAVE YOUR COMMENTS