माधव नेपाल झन् सक्रिय
येँ (नेपालभाषा टाइम्स)÷फागुन २५ गते जुइगु राष्ट्रपति चुनावया लागिं कन्हय् फागुन १३ गते उम्मेदवार दर्ता याये माली जुइधुंकल, तर राजनीतिक पार्टीतय्सं थौं तक नं उम्मेदवार तकं क्वःछी फयाच्वंगु मदुनि ।
अथे खःसां राष्ट्रपति उम्मेदवार क्वःछीगु ज्याय् थःगु हे नां प्रस्तावित यासें नेकपा (एकीकृत समाजवादी) या अध्यक्ष माधव नेपाल धाःसा म्हीगंनिसें अतिकं तीव्र गतिं सक्रिय जुयादीगु दु ।
म्हिगः हे न्हिछि हे धइथें नेपाल थ्व ज्याय् सक्रिय जुयादिल । म्हिगः वय्कलं प्रधानमन्त्री पुष्पकमल दाहाललिसे याकः याकः वार्ता यानादीगु खःसा वयां लिपा जसपाया अध्यक्ष उपेन्द्र यादव व एमालेय उपाध्यक्ष ईश्वर पोखरेललिसे तकं खँल्हाबल्हा यानादिल । वय्कलं म्हिगः हे कांग्रेसलिसे तकं थ्व विषयय् खँल्हाबल्हा यानादीगु खः । राष्ट्रपति पदय् कांग्रेसं शुरुंनिसें हे दावी यानाच्वंगु दु ।
एमाले अध्यक्ष केपी ओलीं माधव नेपालया नां राष्ट्रपतिया रुपय् प्रस्तावित यानादीवं राजनीतिइ मेगु तरंग वःगु खःसा लिसें लिसें माधव नेपालया सक्रियता नं आकाझाकां तच्वया वःगु खः । वय्कःया नां चर्चाय् वयेवं एमालेया छगू पुचलं धाःसा प्रधानमन्त्री जुइधुंकूम्ह मनू राष्ट्रपति जुइ मिले मजू धकाः आलोचना शुरु याना हःगु दु ।
राष्ट्रपतिया लागिं नेकपा (एसं) थः अध्यक्ष माधव नेपालया नां प्रस्तावित याःगु दुसा लोसपां नं थः अध्यक्ष महन्थ ठाकुरया नां प्रस्तावित याःगु दु । एमालें आः तक औपचारिक रुपं छुं मधाःनिसां अध्यक्ष ओलीं माधव नेपाल व सुवास नेम्बाङया नां बियादीगु समाचार पिहां वःगु दु । अथे हे कांग्रेसं नं राष्ट्रपति पदय् दावी याःसां उम्मेदवार धाःसा न्ह्यःने थने हःगु मदुनि ।
एमालें माधव नेपालया नां न्ह्यःने तया बीवं आः पुलांगु गठबन्धन दुने हे कचवं शुरु जूगु दु । आः यदि माधव नेपालयात राष्ट्रपति पदया दावी मयाकेगु खःसा वय्कःयात नं छगू कार्यकाल प्रधानमन्त्री याये मालीगु अवस्था पुलांगु गठबन्धन दुने ब्वलंगु दु । माधव नेपालं न्हापांनिसें हें माओवादी व कांग्रेसं निदँ निदँ शासन यानाः अन्तिम दछि थःपिंत बीमाः धकाः दावी याना वयाच्वंगु दु । गठबन्धन दुने अज्याःगु खँ जुयाच्वंगु हे इलय् आकाझाकां माओवादी अध्यक्ष दाहाल वालुवाटारं बालकोट वना बीवं मेगु खँ न्ह्याः मवंगु खः ।
LEAVE YOUR COMMENTS