न्हूम्ह राष्ट्रपतियात शपथ, पुलांम्हेसित विदाइ

येँ (नेपालभाषा टाइम्स)- न्हू निर्वाचित जुयादीम्ह राष्ट्रपति रामचन्द्र पौडेलं म्हिगः पद व गोपनीयताया शपथ ग्रहण यानादिल । राष्ट्रपति निवास शितल निवासय् म्हिगः ग्वसाः ग्वःगु विशेष ज्याझ्वःया दथुइ राष्ट्रपति पौडेलं शपथ ग्रहण यानादीगु खः ।

नेपाःया संविधानय् राष्ट्रपतिं थःगु कार्यभार कःघाये न्ह्यः संघीय कानुन कथं प्रधानन्यायाधीशपाखें पद तथा गोपनीयताया शपथ कायेमाःगु व्यवस्था कथं न्हू निर्वाचित राष्ट्रपति पौडेलयात कामु प्रधानन्यायाधीश हरिकृष्ण कार्कीं शपथ नकूगु खः ।

नेपाली कांग्रेसया वरिष्ठ नेता लिसें पुलांम्ह सभामुख पौडेल थ्वहे वंगु २५ राष्ट्रपति पदय् निर्वाचित जुयादीगु खः । शपथ ग्रहण ज्याझ्वलय् राष्ट्रपति पौडेलयात नेपाली सेनां २१ तोपया सलामी नं बिउगु खः ।

थ्वहे झ्वलय् म्हिगः हे पुलांम्ह राष्ट्रपति विद्यादेवी भण्डारीयात विदाइ नं याःगु दु । न्हू नियुक्त जूम्ह राष्ट्रपति रामचन्द्र पौडेलं पद तथा गोपनीयताया शपथ कायेवं निवर्तमान राष्ट्रपति भण्डारीयात विदाइ याःगु खः ।

प्रधानमन्त्री पुष्पकमल दाहालं निवर्तमान राष्ट्रपति भण्डारीयात देछा बियाः विदाइ याःगु खः । ज्याझ्वलय् उपराष्ट्रपति नन्दकिशोर पुन, कायम मुकायम प्रधानन्यायाधीश हरिकृष्ण कार्की, राष्ट्रियसभाया अध्यक्ष गणेशप्रसाद तिमिल्सिनापिंसं नं विदाइ यानादीगु खः । पुलांम्ह राष्ट्रपति भण्डारीया विदाइ ज्याझ्वलय् सेनां २१ तोपया सलामी बिउगु खः ।

राष्ट्रपतिइ भण्डारी न्हापांखुसी २०७२ कार्तिकय् निर्वाचित जुयादीगु खःसा लिपांगु कार्यकालया निंतिं २०७४ फागुन २९ गते निर्वाचित जुयादीगु खः ।

विदाइ लिपा वय्कःयात सरकारपाखें हे ससम्मान वय्कःया छेँय् तक त्वःता थकूगु खः । मय्जु भण्डारी भुइजःसिइ च्वंगु थःगु छेँया स्यंल्ह्वं सिमधःनिगु जुयाः म्ह्याय्या छेँय् निं च्वं झाःगु खः ।

थ्वहे झ्वलय् न्हूम्ह राष्ट्रपति रामचन्द्र पौडेलयात अमेरिकाया राष्ट्रपति जो बाइडन व भारतीय राष्ट्रपति द्रोपदी मुर्मुं बधाई सन्देश छ्वया हःगु दु । पौडेलयात बधाई बिउपिं विदेशी राष्ट्राध्याक्ष वय्कःपिं हे न्हापां खः ।