हेटौंडाय् शंखधरया झ्वाता तयाः पार्क दयेकीगु

येँ -नेपाल संवत्या प्रणेता शंखधर साख्वाःया नामं हेटौंडाय् शंखधर पार्क दयेकीगु जूगु दु । शंखधर साख्वाः प्रतिष्ठानया पदाधिकारीपिंलिसे खँ ल्हायेगु झ्वलय् ३ नम्बर प्रदेशया मुख्यमन्त्री डोरमणि पौडेलं हेटौंडाय् शंखधर पार्क दयेकेगु बचं बियादीगु जानकारी प्रतिष्ठानया नायः श्यामकृष्ण मानन्धरं ‘नेपालभाषा टाइम्स’ यात बियादिल ।

थःपिंत नापलायेगु झ्वलय् मुख्यमन्त्री पौडेलं पार्कया डिजाइन दयेकाः थःत बियादिसँ धकाः इनाप याःगु व वहे कथं डिजाइन यायेगु ज्या जुयाच्वंगु जानकारी नं वय्कलं बियादिल । शंखधरपाखें थः प्रभावित जूगु धासें थ्वहे दँया दुने हे हेटौंडाय् पार्क दयेकाः अन शंखधरया झ्वाताः समेत तयेगु बचं नं मुख्यमन्त्री पौडेलं बियादीगु खँ मानन्धरं कनादिल ।

अथेहे थ्वहे वइगु कछलाथ्व दशमी कुन्हु दोलखाया चरिकोटय् नं शंखधर साख्वाःया झ्वाता पलिस्था याइगु जूगु दु । नेवाः गुथि चरिकोटया ग्वसालय् अन शंखधरया झ्वाता तयेगु तयारी जुयाच्वंगु खँ नं प्रतिष्ठानया नायः मानन्धरं कनादीगु दु । शंखधरया झ्वाता धाःसा प्रतिष्ठानं व्यवस्था याःगु खः ।

झ्वाता तयेगु निंतिं चरिकोट नगरपालिकां नं माक्व ग्वाहालि यानाच्वंगु दु । उगु शंखधरया झ्वाताया उलेज्या पर्यटन तथा संस्कृतिमन्त्री रवीन्द्र अधिकारीं यानादीगु ग्वसाः दु । थ्वहे झ्वलय् थिमि मध्यपुर नगरपालिकां थिमिइ नं शंखधर चोकय् छगू बिस्कं पार्क दयेकेगु घोषणा याःगु दु । लिसें आवंनिसें दँय्दसं शंखधर दिवस कुन्हु मध्यपुर थिमि नगरपालिकाया हे ग्वसालय् भिन्तुना कालिबिल ज्याझ्वः ग्वसाः ग्वयेगु नं निर्णय याःगु दु । नगरपालिकाया प्रमुख मदनसुन्दर श्रेष्ठं उगु ज्याझ्वः यायेगु घोषणा यानादीगु खः ।

अथेहे नगर प्रमुख श्रेष्ठं शंखधर साख्वाः मंकाः नेवाः छेँ दयेकेगु घोषणा नं यानादीगु दु । शंखधर चोकय् उगु भवन दयेकेगु तयारी नं वय्कलं यानादीगु खः । थीथी सार्वजनिक ज्याझ्वः समेत याये फइगु उगु नेवाःछेँ दयेकेगु लागिं केन्द्रीय सरकारयाके नं ग्वाहालि कायेगु खँ जुयाच्वंगु दु ।

सम्बन्धित बुखँ

LEAVE YOUR COMMENTS