चीन–रेल वे दयेकेगु ज्या न्ह्यानाच्वंगु दु ः राजदूत यान्छी

येँ (नेपालभाषा टाइम्स)-नेपाःया नितिं चिनियाँ राजदूत होउ यान्छीं नेपाः भूराजनीतिक कासाया रणमैदान जुइ मजिउगु खँ धयादीगु दु । चिनियाँ परराष्ट्रमन्त्री वाङ यीया नेपाः भ्रमणयात कयाः चिनियाँ सञ्चार माध्यम ‘ग्लोबल टाइम्स’यात अन्तर्वार्ता बिसें वय्कलं उगु खँ धयादीगु खः । वय्कलं नेपाः निगूपक्षीय सौहार्द सहकार्य क्यनेगु मंकाः क्यब जुइमाःगु खँ धयासें भूराजनीतिक कासाया रणमैदान जुइ मजिउगु खँ नं धयादीगु खः ।

खँल्हाबल्हाय् राजदूत यान्छीं नेपाः चीनया बांलाःम्ह जःलाखःला खः धासें निगू देय् देशं न्ह्याबलें छम्हं मेम्हेसिया सार्वभौतिकता व अखण्डताया सम्मान याना वयाच्वंगु खँ धयादिल । वय्कलं धयादिल, ‘सुनां नं मेगु देय्या आन्तरिक मामिलाय् हस्तक्षेप यायेगु यानाच्वंगु मदु, आः विश्व महामारीया अवस्थां पिहां वयाः आर्थिक व समाजिक विकासय् न्ह्याःवनेमाःगु हाथ्या झीके दु ।’

उकथं हे राजदूत यान्छीं चिनियाँ परराष्ट्र मन्त्री यीया भ्रमणं नेपाः चीनया नितिं गुलि महत्वपूर्ण जःलाखःला खः धकाः क्यनी धासें धयादिल, ‘नेपालं थःगु आवश्यकता कथं क्वःछिउगु विकास मार्गय् चीनं न्ह्याबलें तिबः व समर्थन यानाच्वनी । लिसें नेपाःया आन्तरिक व बाह्य परराष्ट्र नीतियात चीनं समर्थन यायेगु व नेपाःया बीआरआईलय् दुथ्यायेगु निर्णययात चीनं समर्थन यानाच्वंगु सन्देश परराष्ट्र मन्त्री यीया भ्रमणं बीधुंकूगु दु ।’

अथे हे नेपाः–चीन रेलमार्ग विकास यायेगु नितिं ज्या जुयाच्वंगु व निगू देय्या रेल्वे विभाग दथुइ पौ कालबिल जुयाच्वंगु खँ कँसें वय्कलं पूर्व सम्भाव्यता अध्ययन लिसे छुं महत्वपूर्ण ज्या जूगु खँ कनादिल ।

राजदूत यान्छीं नेपालय् सतक, विमानस्थल, जलविद्युत आयोजना थेंज्याःगु तःधंगु पूर्वाधार विकासया नितिं चीनं ग्वाहालि यानाच्वंगु व बीआरआईं थुगु सहकार्ययात अझ च्वन्ह्याकीगुु खँ नं धयादीगु दु । वय्कलं नेपालं थःगु विकासया नितिं अन्तर्राष्ट्रिय क्षेत्रं ग्वाहालि कायेफइगु व उकिं नेपाः–चीन सम्बन्धय् गुगुं नं कथंया लिच्वः मलाइगु खँ नं स्पष्ट यानादीगु दु ।

वय्कलं धयादिल, ‘नेपाः अल्पविकसित देय् खः, अथे जुयाः विकासया नितिं थीथी स्रोतं ग्वाहालि कयाः अर्थतन्त्रयात न्ह्यःने न्ह्याकेमाः ।’
एमसीसी बीआरआईया प्रतिस्पर्धी योजना खःला धइगु न्ह्यसःया लिसः बिसें राजदूत यान्छीं धयादिल,

‘जिमित आशा दु, अन्तर्राष्ट्रिय जगतं नं नेपाःया राष्ट्रिय विकास लक्ष्ययात हासिल यायेगु मनसाय तयाः जक ग्वाहालि यानाच्वंगु दु ।’

सम्बन्धित बुखँ

LEAVE YOUR COMMENTS