ओलीया सभाय् पत्रकारतय्त दुव्र्यवहार

येँ – वंगु शुक्रवाः प्रधानमन्त्री केपी ओली पक्षपाखें याःगु आमसभाया इलय् थीथी समाचार संस्थाया पत्रकारतय्त नेकपाया कार्यकर्तातय् दुव्र्यवहार याःगु धासें नेपाल पत्रकार महासंघं भत्सर्ना याःगु दु ।

पत्रकार महासंघया कथं आमसभाया समाचार संकलन यानाच्वंपिं कान्तिपुर न्हिपौया पत्रकार विनु सुवेदी, नयाँ पत्रिका न्हिपौया पत्रकार दिपेश शाही व देशसञ्चार अनलाइनया पत्रकार दीपा दाहालयात दुव्र्यवहार याःगु खः ।

दरवारमार्गय् जूगु आमसभाया समाचार संकलन यानाच्वंपिं पत्रकारतय्सं प्रेसया म्हसिका पाखै क्यंसां हे नेकपाया कार्यकर्तातय्सं समाचार संकलन यायेत पंगः थनाः दुव्र्यवहार याःगु खँ धाःगु दु ।

महासंघं छगू वक्तव्य पितबिसें स्वतन्त्र रुपं थःगु पेशागत जिम्मेवारी कथं ज्या यानाच्वंपि पत्रकारतय्त लक्षित यानाः समाचार संकलनय् पंगः थनेगु, दुव्यर्वहार यायेगु ज्या प्रेस स्वतन्त्रताय् हस्ताक्षेप जूगु खँ धाःगु दु । महासंघं प्रेस स्वतन्त्रता विरोधी थज्याःगु घटनाया कडा भत्सर्ना याइ धासें पत्रकारतय् संवैधानिक अधिकारया सम्मान यायेत सकलें पक्षयात माग याना धाःगु दु । अथेहे पत्रकारतय्त स्वतन्त्र व निर्वाध रुपं ज्या यायेगु वातावरण दयेकेत नं सरकारया ध्यानाकर्षण याना धाःगु दु ।