-यापया विवादित मुखः गुरुजुयात लित बिल

येँ (नेपालभाषा टाइम्स)- -याप गायनय् आधारित रियालिटी शो ‘नेपहपया श्रीपेच’ यात कयाः विवाद ब्वलनेवं निर्णायक बालेन साह व विजेता भाइबर साइमनं बौद्ध गुरुजुपिंत उगु मुखः लित बिउगु दु । म्हिगः थनया ज्याथाय् वज्राचार्य क्लबया ग्वसालय् छगू ज्याझ्वलय्
रियालिटी शोपाखें मचायेक गल्ती जूगु धासें मेयर बालेन साहं क्षमा फ्वनादीगु खः । लिसें वय्कलं देय् थाय्पा मोतिरत्न वज्राचार्ययात मुखः नं लःल्हानादीगु दु ।

शोया निर्माता सुदिप पोखरेलं धार्मिक भावनाय् घाः लाकेगु थःपिनिगु उद्देश्य मखु धासें मुखः लित बिउगु खः । वंगु शनिवाः क्वचाःगु शोया फाइनलय् येँ महानगरपालिकाया मेयर तकं जुयादीम्ह साहं विजेता साइमनयात पञ्चबुद्धया मुखः पुइकूगु खः । मुखः पुइकूगु खँयात कयाः विरोध जुइवं उकियात कयाः येँ महानगरपालिकाय् बैठक च्वंगु खः । बैठक लिपा बज्राचार्य गुरुजुयात मुखः लित बिउगु खः ।

आः मेयर साहं लित बी हःगु उगु मुखः छु यायेगु धकाः वज्राचार्यं क्लबया मुँज्या च्वनेत्यंगु खँ सीदुगु दु । क्लबं भविष्यय् वनाः वज्राचार्य सम्बन्धी छगू म्युजियम चायेकेगु योजना दयेकातःगु दुसा उगु मुखःयात नं अन हे तये फइगु खँ क्लब जः शैलेन्द्र वज्राचार्यं कनादिल । आःयात थ्व मुखः क्लबपाखें निं कया तयेगु खँ नं वय्कलं धयादिल । थ्व मुखः विधिपूर्वक पूजा यायेधुंकल कि गुरुजुपिंसं पूसां जिउगु खँ नं धाःगु दु ।

ग्वसाः खलकं -याप धेंधेंबल्लाः जूकुन्हु हे बजारय् वनाः उगु मुखः न्याना हःगु खँ धाःगु दु । विजेतायात पुइकेगु मुकुटया डिजाइन न्हापा हे तयार याना तःगु खःसां कार्यक्रमया इलय् तक नं मुखः तयार मजूगुलिं ग्वसाः खलकं बजारय् वनाः उगु मुखः न्याना हःगु खँ धाःगु दु ।