बागमतीइ अविश्वास प्रस्ताव छु जुयाच्वन
येँ -केन्द्रय् जूगु सरकार परिवर्तन लिपा आः लुम्बिनी व बागमति प्रदेशय् नं एमाले समर्थित सरकार क्वःदलीगु स्पष्ट संकेत खने दया वःगु दु । लुम्बिनी प्रदेशया मुख्यमन्त्री शंकर पोखरेल विरुद्ध म्हिगः अविश्वासया प्रस्ताव दर्ता जूगु दुसा बागमति प्रदेशया मुख्यमन्त्री डोरमणि पौडेल विरुद्धया अविश्वास धाःसा छुं ई स्थगित जूगु दु ।
मुख्यमन्त्री पौडेल विरुद्ध अविश्वास प्रस्ताव तयेत माओवादी व एमालेया माधव नेपाल पक्षीय सांसदतय्सं हस्ताक्षर याना तयेधुंकूगु दु । तर केन्द्रय् एमाले पार्टी एकताया नितिं वरिष्ठ नेता माधव नेपाल व अध्यक्ष केपी ओली पुचःया दथुइ एकताया लागिं वार्ता जुयाच्वंगुलिं अविश्वासया प्रस्ताव तत्काल दर्ता मयायेगु खँ छम्ह सांसदं ‘नेपालभाषा टाइम्स’ यात कनादिल । वय्कलं धयादिल, ‘अविश्वासया प्रस्ताव दर्ता यायेगु वा मयायेगु धइगु खँ आः नेपाल पक्षया ल्हातय् दु, यदि नेपाल पक्ष केन्द्रीय सरकारय् दुहां वन धाःसा प्रदेशय् मुख्यमन्त्री विरुद्ध अविश्वासया प्रस्ताव दर्ता जुइ, सरकारय् मनव धाःसा थन अविश्वास प्रस्ताव वइगु सम्भावना म्हो जुइ ।’
एमालेया हे छुं सांसदत अविश्वास प्रस्ताव दर्ता यायेत न्ह्यचिलाच्वंगु खःसां केन्द्रया निर्देशन मवःगुलिं दर्ता अलमल जुयाच्वंगु खँ नं वय्कः सांसदं कनादीगु दु ।
मेखे लुम्बिनी प्रदेशय् धाःसा मुख्यमन्त्री शंकर पोखरेल विरुद्ध अविश्वासया प्रस्ताव दर्ता जूगु दु । म्हिगः प्रदेशसभा सचिवालयय् उगु प्रस्ताव दर्ता जूगु खः । संविधानया धारा १८८ या उपधारा ४ व लुम्बिनी प्रदेशसभा नियमावली २०८४ या नियम १४४ या उपनियम १ कथं प्रस्ताव दर्ता जूगु खः । मुख्यमन्त्री पोखरेल विरुद्ध वःगु थ्व स्वक्वःगु अविश्वासया प्रस्ताव खः ।
एकल बहुमतया आधारय् दयेकूगु पोखरेलया सरकार अल्पमतय् लाःगुलिं विश्वास मदु धइगु खँ अविश्वास प्रस्तावय् न्ह्यथनातःगु दु । अविश्वासया प्रस्तावय् ३४ म्ह सांसदतय्सं हस्ताक्षर याःगु दु । थुकी मुख्यमन्त्रीया रुपय् माओवादी केन्द्रया कुलप्रसाद केसीयात प्रस्ताव यानातःगु दु ।
नेकपा विभाजन जुइधुंकाः मुख्यमन्त्री पोखरेल विरुद्ध दकलय् न्हापां वैशाख ६ गते अविश्वासया प्रस्ताव दर्ता जूगु खः । उगु प्रस्ताव लिपा प्रदेश प्रमुख धर्मनाथ यादवं वैशाख १९ गते प्रदेशसभा बैठक सःतादीगु खः । तर बैशाख १९ गते मुख्यमन्त्री पोखरेलं राजीनामा बिसें अधिवेशन हे अन्त्य याना बिल । वयां लिपा वैशाख २६ गते विपक्षी गठबन्धनं निक्वःखुसी अविश्वसाया मत व प्रदेशसभा सःतेगु निंतिं समावेदन याःगु खःसा प्रदेश प्रमुख यादवं उकिया औचित्य मदु धासें प्रस्ताव खारेज यानाबिउगु खः । आः प्रदेश प्रमुख हे हीकाः सरकार क्वःथलेगु योजना न्ह्याकूगु खः ।
LEAVE YOUR COMMENTS