चुनाव लिपा सत्ता गठबन्धनया न्हापांगु बैठक
येँ (नेपालभाषा टाइम्स)÷ प्रतिनिधिसभा र प्रदेशसभा सदस्यया चुनाव लिपा म्हिगः न्हापांखुसी सत्ता गठबन्धनया बैठक च्वन । बैठकय् गठबन्धनय् दुथ्याःगु न्यागू दलया नेतातय्सं ब्वति काःगु खः । बैठक प्रधानमन्त्री निवास बालुवाटरय् च्वंगु खः । चुनावया समीक्षा व भावी सरकार निर्माण बारे सहलह यायेत उगु बैठक च्वंगु खः ।
न्यागू दलीय गठबन्धनय् थौंकन्हय् नेपाली कांग्रेस, नेकपा (माओवादी केन्द्र), नेकपा (एस), लोकतान्त्रिक समाजवादी पार्टी व राष्ट्रिय जनमोर्चा दुथ्यानाच्वंगु दु । बैठकय् चुनावया न्ह्यःने गठबन्धन त्वःता वंगु पार्टी जसपायात धाःसा सःतातःगु मदु ।
म्हिगःया बैठकय् नेपाली कांग्रेसया सभापति लिसें प्रधानमन्त्री शेरबहादुर देउवा, वरिष्ठ नेता रामचन्द्र पौडेल, उपसभापति पूर्णबहादुर खड्का, नेता कृष्ण सिटौला, माओवादी केन्द्रया अध्यक्ष पुष्पकमल दाहाल, वरिष्ठ उपाध्यक्ष नारायणकाजी श्रेष्ठ, महासचिव देवप्रसाद गुरुङ, नेकपा (एस) या अध्यक्ष माधवकुमार नेपाल, महासचिव वेदुराम भुसाल व जनमोर्चाया दुर्गा पौडेलपिं सहभागी जुयादीगु खः ।
वंगु मसिरय् जूगु चुनावय् प्रतिनिधिसभाया प्रत्यक्षपाखें नेपाली कांग्रेसं ५७ सिट त्याकूगु दुसा माओवादी केन्द्रपाखें १८ सिट त्याकूगु दु । अथे हे नेकपा (एस) पाखें १०, लोकतान्त्रिक समाजवादीपाखें प्यंगू व राष्ट्रिय जनमोर्चां छगू सिट त्याकूगु दु । गठबन्धनय् सीके राउतया जनमत पार्टी नं दुथ्याइगु खँ दु ।
LEAVE YOUR COMMENTS