जनसंख्याया चाप राजधानी येँय्, नेपाःया न्हूगु जनसंख्या २ करोड ९१ लाख ९२ हजार ४८०

येँ – नेपाःया न्हूगु जनसंख्या २ करोड ९१ लाख ९२ हजार ४८० थ्यंगु दु । केन्द्रीय तथ्यांक विभागं म्हिगः राष्ट्रिय जनगणना–२०७८ या प्रारम्भिक रिपोर्ट सार्वजनिक याःगु खः ।

थनिं झिदँ न्ह्यः नेपाःया जनसंख्या २ करोड ६४ लाख ९४ हजार ५०४ थ्यनाच्वंगु खः । झिदँ न्ह्यःया गणना स्वयां थुगुसी २६ लाख ९७ हजार ९७६ म्ह थपे जूगु दु । थ्व धयागु १०.१८ प्रतिशत अप्वः खः । थ्व ल्याखं वंगु झिदँया दुने नेपाःया जनसंख्या वृद्धिदर ०.९३ प्रतिशत थ्यंगु दु । थ्व स्वयां न्ह्यः नेपाःया जनसंख्या वृद्धिदर १.३५ प्रतिशत थ्यनाच्वंगु खः ।

न्हूगु जनगणना कथं जनसंख्याया अप्वः चाप धाःसा अझ नं स्वनिगः व उकिसनं राजधानी येँ देशय् हे लानाच्वंगु खनेदु । देय्या ७७ जिल्ला मध्ये दकलय् अप्वः जनसंख्या दुगु जिल्ला येँ खः । येँ जिल्लाय् २० लाख १७ हजार ५३२ जनसंख्या दु । वयां लिपा छसिकथं मोरङ, रुपन्देही, झापा व सुनसरी जिल्ला लानाच्वंगु दु । स्वनिगःया जिल्लात मध्ये यल जिल्लाया जनसंख्या ५ लाख ४८ हजार ४०१ दु । अथे हे ख्वप जिल्लाया जनसंख्या ४ लाख ३० हजार ४०८ दु ।

स्थानीय तहया ल्याखं नं दकलय् अप्वः जनसंख्या दुगु स्थानीय तह येँ महानगरपालिका जूगु दु । येँ महानगरपालिकाया जनसंख्या ८ लाख ६५ हजार ९०६ थ्यंगु दु । येँ महानगरपालिका धुंकाः दकलय् अप्वः जनसंख्या दुगु महानगरपालिकात छसिकथं पोखरा, भरतपुर, यल व वीरगञ्ज लानाच्वंगु दु ।

जनघनत्वया ल्याखं नं येँ जिल्ला दकलय् अप्वः जनघनत्व दुगु जिल्ला जूगु दु । येँ जिल्लाय् प्रति वर्ग किलोमिटर ५,१०८ म्ह जनसंख्या दु । दकलय् कम जनघनत्व दुगु जिल्ला चाहिँ मनाङ जिल्ला जूगु दु । अन प्रति वर्गकिलोमिटर मुक्कं ३ म्ह जक च्वनेगु याइ ।

न्हूगु जनगणना कथं शहरी जनसंख्या नं अप्वःगु दु । आः नेपालय् शहरय् च्वनीपिं जनसंख्या ६६.०८ प्रतिशत थ्यंगु दु । ग्रामिण जनसंख्या धाःसा ३३.९२ प्रतिशत थ्यंगु दु । थनिं झिदँ न्ह्यःया जनगणनाय् शहरी जनसंख्या १७.०७ प्रतिशत व ग्रामिण जनसंख्या ८२.९३ प्रतिशत दुगु खः । शहरी जनसंख्याय् वःगु थ्व अत्यधिक वृद्धिया नापनापं आः नेपाःयात ‘गांया गांयागु देश’ धकाः धाइगु धापू नं पाय्छि मजूवंगु दु ।
तथ्यांक विभागं धाः कथं राष्ट्रिय जनगणनाया थ्व ल्याखय् भारतया कब्जाय् लानाच्वंगु नेपाःया भूभाग कालापानी, लिपुलेक व लिम्पियाधुराया जनसंख्या नं दुथ्याःगु दु ।