महानगर दिवस स्वन्हुयंकं हनीगु

येँ -येँ महानगरपालिकां २७ क्वःगु महानगर दिवस स्वन्हुयंकं थीथी ज्याझ्वः यासें तःजिक हनीगु जूगु दु । म्हिगः छगू पत्रकार सम्मेलन यासें येँ मनपाया मेयर विद्यासुन्दर शाक्यं थुकिया जानकारी बियादीगु खः ।

महानगर दिवसया झ्वलय् म्हिगः हे सुथय् वाकाथन ज्याझ्वः शुरु जूगु दु । थनिंनिसें मनपाया ४० गू थासय् बुथ तयाः नागरिक राय कायेगु ज्या न्ह्याकूगु दु । थ्व झ्वलय् ज्याथजिथिपिंत निःशुल्क निमोनिया खोप, सर्वसाधारणयात कोरोना विरुद्धया खोप बीगु ज्याझ्वः नं तयातःगु दु । अथे हे थ्व झ्वलय् फुटबल कासा, निबन्ध धेंधेंबल्लाः कासा, सम्पदास्थलय् यचुपिचु ज्याझ्वः आदि नं तयातःगु दु ।
मंसिर २९ गते महानगर दिवसया मू ज्याझ्वः जुइ । थनया बसन्तपुली दबू ग्वयाः जुइगु उगु ज्याझ्वलय् जनप्रतिनिधि, कर्मचारी, पत्रकार आदिपिंत सम्मान व सिरपाः लःल्हायेगु ज्या जुइ ।

म्हिगः जूगु पत्रकार सम्मेलनय् येँ मनपाय् निर्वाचित जनप्रतिनिधिपिं वयेधुंकाः जूगु थीथी विकास निर्माण सम्बन्धी ज्याखँया सामान्य धलः नं न्ह्यब्वःगु खः । उकियात कयाः पत्रकारतय्सं न्यंगु थीथी न्ह्यसः लिसः बिसें मेयर शाक्यं येँय् गबलें मेलम्ची पाइप लायेगु व गबलें विद्युत प्राधिकरणया तार लायेगु धकाः लाक्वपाक्व इलय् सतक म्हुइगु ज्या यानाः दुःख जुयाच्वंगु खँ कनादिल । अथे हे संघ व प्रदेशया सांसदतय्सं थःपिनि कोषं वःगु दांपाखें येँय् वडातय्सं याइथेंज्याःगु ज्या यानाच्वंगु जुयाः अथे मयासे सकस्यां ध्यबा छथाय् तयाः छगू तःधंगु हे ज्या याना बीत इनाप यानादिल ।