बागमतिइ नेवाः व तामाङ भाय्यात मान्यताया तयारी, सरकारपाखें कार्यदल गठन

येँ (नेपालभाषा टाइम्स)- बागमति प्रदेशय् नेपालभाषा व तामाङ भाय्यात सरकारी ज्याखँया भाय् दयेकेगु निंतिं कार्यदल नीस्वंगु दु । म्हिगः च्वंगु बागमति प्रदेश मन्त्रिपरिषद बैठकय् आन्तरिक मामिला तथा कानुन मन्त्री गंगानारायण श्रेष्ठं नेपालभाषा व तामाङ भाय्यात भाषा आयोगं सिफारिस याः कथं प्रदेशया कामकाजी भाषाया रुपय् छ्यलेगु प्रस्ताव यानादीगु खःसा उगु प्रस्तावयात कार्यान्वयन यायेगु निंतिं मुख्यमन्त्री शालिकराम जम्मरकट्टेलं कार्यदल गठन यानादीगु खः ।

सामाजिक विकास मन्त्री कुमारी मोक्तानया संयोजकत्वय् गठन याःगु उगु कार्यदलय् श्रम रोजगार तथा यातायात मन्त्री एकलाल श्रेष्ठ, पर्यटन, उद्योग तथा सहकारी मन्त्री डम्बरबहादुर तामाङ, नेपालभाषा व तामाङ भाय्या छम्ह छम्ह विज्ञ नं दुथ्याकीगु खँ दु ।

गंगानारायण श्रेष्ठ मन्त्री नियुक्त जुइवं नेपाल समाजवादी नेवाः संघया नायः माधव श्रेष्ठया नेतृत्वया पुचलं वय्कःयात ज्ञापन पौ बिसें भाषा आयोगया सिफारिस कथं नेपालभाषा व तामाङ भाय्यात बागमति प्रदेशया कामकाजी भाषाया मान्यता बीमाःगु माग याःगु खः।

उकथं हे बागमति प्रदेशया मन्त्रिपरिषदं प्रदेशया झिंस्वंगुलिं जिल्लाय् एकीकृत सेवा कार्यालय चायेकेगु तयारी कथं प्रमुख सचिव मुकुन्दप्रसाद निरौलाया संयोजकत्वय् अध्ययन कार्यदल नं नीस्वंगु दु ।
बैठकं सहज रुपय् नागरिकयात सेवा प्रवाह यायेगु आज्जु कथं प्रदेशया फुक्कं जिल्लाय् एकीकृत सेवा सञ्चालनयात नितिं अध्ययन यायेत कार्यदल गठन याःगु खः ।

मन्त्री श्रेष्ठं प्रदेशया फुक्कं प्रशासनिक ज्याकू हेटौंडा व येँय् केन्द्रित जुयाः सेवाग्राहीयात समस्या जूगुलिं एकीकृत सेवा सञ्चालन यायेमाःगु खँ कनादीगु दु । प्रदेश सरकारं जिल्लाय् न्ह्याकीगु योजना कार्यान्वयन यायेत समस्या वःगुलिं एकीकृत सेवा सञ्चालन यायेमाःगु खः ।