गुथि विधेयकयात कयाः शाक्य महाविहार संघया चिउताः

येँ – येँ देय्या शाक्यतय् महाविहारया संगठन शाक्य महाविहार संघया न्याक्वःगु बुन्हि वंगु शनिवाः हन । संघया बुन्हि हनेगु झ्वलय् सरकारं हालय् जक हःगु गुथि विधेयक आःयात लित जक काःगु तर खारेज खारेज मयानीगु खँय् चिउताः प्वंकूसे उकियात खारेज हे यायेत माग याःगु दु ।

संघया नायः शुभकाजी शाक्यया सभापतित्वय् न्ह्याःगु ज्याझ्वःया मूपाहां प्रदेश नं ३ या सांसद राजेश शाक्यं नेपालमण्डलया तःजिगु संस्कृति धइगु हे बौद्ध संस्कृति व बौद्ध परम्परा खः धासें थज्याःगु ज्वःमदुगु परम्परायात बौद्ध महाविहार संघं ल्यंका तःगु दु धयादिल ।

संघया बुन्हिया ज्याझ्वलय् पुलांम्ह मन्त्रीलिसें बौद्ध विद्वान डा. केशवमान शाक्यं बुद्धवंशयात कयाः दुवाला दीगु खः । नःघः बहाःया रत्नमान शाक्यया उपस्थितिइ जूगु उगु ज्याझ्वलय् महासंघया न्वकु अमिरमान शाक्यं लसकुस यानादीगु खःसा ज्याझ्वः संघया छ्याञ्जे संघरत्न शाक्यं न्ह्याकादीगु खः ।