कांग्रेसं मालाच्वन येँया मेयर उम्मेदवार

येँ – वैशाख ३० गते जुइगु धकाः प्रस्तावित स्थानीय चुनावया लागिं संघीय राजधानी येँ देय्या मेयरय् थनेत कांग्रेसं उम्मेदवार ल्ययेगु ज्या न्ह्याकूगु दु । थुकी विशेष यानाः कांग्रेस नेता प्रकाशमान सिंह हे दकलय् सक्रियपूर्वक खटे जुयाच्वंगु नं सीदुगु दु ।

मेयरया उम्मेदवार जुइगु लागिं प्रकाशमानया टेबुलय् थीथी कार्यकर्ताया नां वयाच्वंगु दुसा मेपिं गुलिखे कार्यकर्तातय्सं थःथम्हं हे थःगु नां प्रचार यानाच्वंगु नं लूगु दु । सम्भावित मेयरया उम्मेदवार धकाः थीथी मनूया नां न्ह्यःने वयाच्वंसां नेता सिंहया ध्यान धाःसा छम्ह गबलें नां पिहां मवःम्ह मनूपाखे केन्द्रित जुयाच्वंगु खँ सूत्रं धाःगु दु ।

प्रकाशमानं थौंकन्हय् पुलांम्ह मेयर पीएल सिंहया किजा इन्द्रलाल सिंहयात उम्मेदवार दयेकेगुपाखे बिचाः यानाच्वंगु खँ सूत्रं धाःगु दु । शहरी विकासय् विज्ञता हासिल यानादीम्ह इन्द्रलाल सिंहं तःदँ हे राष्ट्र संघय् च्वनाः थ्व विषयय् ज्या यानादीगु दु । कांग्रेसय् वय्कःयात म्हो जक कार्यकर्तां म्हसिउ ।

अथे खःसां वय्कःयात वर्तमान उपमेयर हरिप्रभा खड्गी श्रेष्ठ, कांग्रेस महानगर समितिया सभापति लिसें वडा २५ या वडाध्यक्ष निलकाजी शाक्यपाखें धाःसा कडा दबाब वनाच्वंगु दु । लिसें ११ वडाया वडाध्यक्ष हिरालाल तण्डुकार व १६ या वडाध्यक्ष मुकुन्द रिजालं नं मेयरया टिकट दावी यानाच्वंगु दु ।

तर चाक्सीवारीइ धाःसा पुलांम्ह हे उम्मेदवार राजुराज जोशी, मदुम्ह नेता नविन्द्रराज जोशीया कलाः सपना जोशीया नांयात कयाः नं छलफल जुयाच्वंगु खँ धाःगु दु । पिने धाःसा पुलांम्ह मन्त्री भिमसेनदास प्रधान व पुलांम्ह राज्यमन्त्री तीर्थराम डंगोलया नांयात कयाः नं चर्चा जुयाच्वंगु दु । प्रधानमन्त्री शेरबहादुर देउवाया छनौट धाःसा प्रगतिमान रञ्जित जुइ फइगु खँ सूत्रं धाःगु दु ।

पीएल सिंह धुंकाः येँया मेयरय् कांग्रेस त्याःगु मदुनि । थुगुसी एमाले विभाजित जूगु कारणं येँय् थःपिं त्याये फइगु विश्लेषण कांग्रेसं यानाच्वंगु दुसा उकिं हे यानाः टिकटया दावेदारत नं अप्वयाच्वंगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS