दक्षिणकालीइ येँ महानगरपाखें कलात्मक ध्वाखा दयेकीगु

येँ – येँय् नं दक्षिण भेगय् लाःगु धार्मिक ल्याखं अतिकं नांजाःगु दक्षिणकाली द्यःयाथाय् कलात्मक ध्वाखा निर्माण याइगु जूगु दु । येँया दक्षिण भेगय् लाःगु दक्षिणकाली द्यःया थाय् कलात्मक ध्वाखा दयेकेत शिलान्यास याःगु दु ।

येँ महानगरपालिका व दक्षिणकाली नगरपालिका दथुइ अन्तर नगर साझेदारी ज्याझ्वः अन्तर्गत उगु शिलान्यास जूगु खः । दक्षिणकाली देगः परिसरया पूर्वाधार व प्रवेश द्वार निर्माण आयोजना अन्तर्गत उगु शिलान्यास जूगु खः ।

येँ महानगरपालिका प्रमुख विद्यासुन्दर शाक्य व दक्षिणकाली नगरपालिका प्रमुख मोहन बस्नेतं मंकाःकथं शिलान्यास यानादीगु उगु ध्वाखा येँ महानगरया आर्थिक ग्वाहालिइ निर्माण जुइत्यंगु खः । नगर साझेदारी ज्याझ्वः अन्तर्गत येँ महानगरपाखें प्राप्त अनुदानपाखें दक्षिणकाली नगरपालिकां उगु परियोजना न्ह्याकूगु खः ।

थ्व बाहेकं दक्षिणकाली द्यः व देगःयात अझ व्यवस्थित यायेगु ल्याखं खृगू क्षेत्रय् ज्या जुयाच्वंगु दुसा थुगुसी संचालन जुइगु परियोजनाया लागत छगू करोड २३ गू लख क्वःछिनातःगु खःसां खुल्ला प्रतिस्पर्धापाखें निर्माण कम्पनीं ८६ गू लख स्वीस्वद्वः तकां निर्माण यायेगु कबुल याःगु खः ।

शिलान्यास लिपा ज्याझ्वलय् नवासें येँ महानगर प्रमुख शाक्यं जनतां उपभोग याइगु, जनतायात दइगु व जनतां लबः काइगु छुं नं ज्याखँय् अस्वस्थ प्रतिस्पर्धा यायेगु स्वये मजिउ धयादिल । स्वनिगलय् दयाच्वंगु दक्वं समस्या छगू हे जूगु धासें वय्कलं धयादिल, ‘स्वनिगःया समस्या छगू हे खः । उकिं छगू थासय् विकास याये, छगू जक थाय्यात दयेके धकाः मेगु थाय्यात अथें त्वःताबिल धाःसां उकिं यानाः याःगु ज्या नं खण्डीकृत जुइ ।’

‘जिमिसं स्वनिगःया एकीकृत विकास जुइमा धइगु चाहना यानाच्वनागु दु, उकिया निंतिं नगर दथुइ सहकार्य, समन्वय व साझेदारी आवश्यक जुइ । उकियात पूवंकेत येँ महानगरं नेतृत्व यानाच्वंगु दु’, वय्कलं धयादिल ।

दक्षिणकाली नगरपालिकाया प्रमुख बस्नेतं येँ महानगरं उदार नुगः ज्वनाः जःखः च्वंगु नगरया भौतिक समृद्धिया निंतिं ग्वाहालि यानाच्वंगु खँय् च्वछायादिसें येँया जनतायात आवश्यक जुइगु उत्पादन व हलज्वलं थःपिनिगु नगरय् दुगुलिं जिमिसं नं महानगरया जनताया आवश्यकता पूवंकेत ग्वाहालि यायेगु जुइ धयादिल ।

येँ महानगर उपप्रमुख हरिप्रभा खड्गी श्रेष्ठं स्वनिगःया दक्वं नगरया समृद्धियात न्ह्यःने यंकेत महानगरपालिका न्ह्याः वनाच्वंगु खँ न्ह्यथनादिसें स्वनिगःया विकास यायेगु खःसा चिचिधंगु समस्या जक समाधान याना वन धाःसा ततःधंगु थासय् तक वनाच्वने माली मखु धयादिल ।

दक्षिणकालीया उपप्रमसख वसन्ती तामाङ डंगोलं नगर साझेदारी ज्याझ्वःयात सतिकं अनुभव याये खंगुलिं लसता प्वंकादिसें महानगरं चिचिधंगु नगरयात यानाच्वंगु ग्वाहालि च्वछायेबहजू धयादिल ।

सम्बन्धित बुखँ

LEAVE YOUR COMMENTS