ने. सं. ११४६ बछलागा तृतीया -

मरु सतः चायेकीगु अझं अनिश्चित

येँ (नेपालभाषा टाइम्स)- पुनर्निर्माण क्वचायेधुंकाः नं तालं ग्वयातःगु मरु सतःया ताःफ्वः गबले चायेकीगु खः, आः झन् हे धाये मफइगु जूगु दु । मरु सतः दुने गोरखनाथया पुलांगु मूर्ति लिकयाः न्हूगु तल धकाः लाःगु रिटया फैसला म्हिगः नं जुइ मफयेवं मरु सतःया ताःफ्वः चायेकीगु न्हि नं अन्यौलग्रस्त जूवंगु खः ।

२०७२ साल वैशाख १२ गतेया तःभुखाचं मरु सतः पाःताः जुइक दुंगु खः । अबलय् मरु सतः दुने च्वंगु गोरखनाथ व प्यम्ह गणेद्यःया मूर्ति नं कुचा जुइक स्यंगु खः । मरु सतः पुनर्निर्माण जूबलय् अन दुने च्वंगु द्यःया स्यंगु मूर्तित लिकयाः न्हूगु तया बिल । तर सम्पदाप्रेमितय्सं पुरातात्विक महत्व दुगु पुलांगु मूर्ति लिकयाः न्हूगु तल धासें उकिया विरुद्ध सर्वोच्चय् रिट दायर तल । उगु रिटयात कयाः जूगु सुनुवाइया झ्वलय् झ्वलय् म्हिगः अन्तिम फैसला बीगु धयातःगु खः । तर म्हिगः नं फैसला मयासे आः वि.सं. २०८० सालया भदौ ३ गतेया मिति बिया हःगु दु ।

मरु सतः पुनर्निर्माण समितिया नायः लिसें पुलांम्ह सांसद राजेश शाक्यया कथं सर्वोच्चं म्हिगः फैसला याःगु जूसा उकियात पालना यासें फागुन १ निसें मरु सतलय् ग्वयातःगु ताःफ्वः चायेकाः सर्वसाधारणया लागिं खुल्ला यायेगु ग्वसाः दुगु खः । आः फैसला मजुइकं मरु सतः चायेकल धाःसा अदालतया मानहानी जुल धइगु खँ वयेफुगु जूगुलिं फैसला पियाच्वनागु खँ वय्कलं कनादिल ।

आः सर्वोच्चपाखें न्ह्यागु हे फैसला वःसां उकियात तुरुन्त पालना यानाः न्ह्याः वनेगु खँ वय्कलं कनादिल । वय्कलं धयादिल, ‘न्हूगु मूर्ति तःगु ठीक जू धाल धाःसा बां हे लात । मखु, पुलांगु हे तयेमाः धाल धाःसा आः पुरातत्व विभागय् सुरक्षितपूर्वक तयातयागु पुलांगु हे मूर्ति हयाः तया बी । छुं समस्या मदु ।’

नेवाः समाजय् खण्डित मूर्ति पुज्याये मजिउ धइगु मान्यता दुगु जुयाः समितिं अन स्यंगु पुलांगु मूर्ति लिकयाः न्हूगु तयागु खँ नं वय्कलं कनादिल । फैसला हुने गरी नयाँ मिति तोकिएको छ । मरु सतः पुनर्निर्माण सम्पन्न यानाः वंगु २०७८ चैत्र २२ गते राष्ट्रपतिया ल्हातिं येँ महानगरपालिकालाई हस्तान्तरण याःगु खः ।