सर्वोच्चया फैसला ओलीं न्हापा हे सिउ !

येँ – स्वदँ न्ह्यः एकीकरण जुयाः निर्माण जूगु ‘नेकपा’ यात नांया कारण क्यनाः सर्वोच्च अदालतं विभाजन यायेत्यंगु दु धइगु खँया जानकारी प्रधानमन्त्री ओलीयात न्हय्ला च्याला न्ह्यः हे दुगु खँ धयाहःगु दु । विज्ञ सूत्रतय्सं धाः कथं प्रम ओलीयात थुकिया जानकारी न्हापा हे दुगु जुयाः वय्कलं संसद पुनस्र्थापना जूसां नं छफुति हे आँटे मचासे कार्यकर्तातय् मनोबल थकायेगु ज्या याना च्वनादीगु खः ।

संसद पुनस्र्थापना जुइवं पराजित मानसिकता ज्वनाः थःथाय् वइपिं कार्यकर्तातय्त समेत वय्कलं ‘आः छुं यानादी मते, उपाय यक्व दनि’ धकाः हःपाः बीगु यानादीगु खः ।

संसद पुनस्र्थापना मजूतले पार्टी विभाजनय् सुयात आधिकारिक मान्यता बीगु धइगु खँय् निर्वाचन आयोग नं अन्यौलय् लानाच्वंगु खःसा संसद पुनस्र्थापना जुइवं आयोगं फैसला बीगु तयारी याःगु खः । तर आयोगय् खड्ग ओलीं हे नियुक्त यानातःम्ह आयुक्त दिनेशकुमार थपलियां ‘थुकिया बारे सर्वोच्चं नं फैसला यायेत्यंगु दु, उकिं झी छन्हु निन्हु पीगु खः लाकि’ धकाः निर्णय मयाकुसे रोके यानातःगु खँ नं सूत्रं धाःगु दु । थपलियां अथे धाःगुयां निन्हु लिपा हे सर्वोच्चपाखें एमाले व माओवादी केन्द्र पुलांगु हे रुपय् लिहां वने माःगु फैसला न्यंकूगु खः ।

सूत्रतय्सं धाःकथं सर्वोच्चं उगु फैसला न्यंकूगुयां १ घन्टा लिपा हे उकिया जानकारी बीगु पत्र निर्वाचन आयोगय् थ्यंगु खः । आयोगया ज्याकुथी सर्वोच्चया निर्णय नापनापं पौ समेत थ्यंकः वःगु खनाः गुलिखे आयोगया कर्मचारीत नं अजूचाःगु खः ।

थुपिं थीथी गतिविधिया कारणं यानाः सर्वोच्चपाखें थज्याःगु फैसला वयेत्यंगु बारे प्रधानमन्त्री ओली न्हापा हे जानकार जूगु खँ धयाहःगु दु ।

सम्बन्धित बुखँ

LEAVE YOUR COMMENTS