ने. सं. ११४४ कछलागा पारू -

बालेन साह विरुद्ध वृहत् प्रदर्शन

येँ (नेपालभाषा टाइम्स)- येँ महा नगरपालिकाया मेयर बालेन साहं याना–च्वंगु थीथी ज्यादतिपूर्ण ज्याखँया विरोधय् म्हिगः थनया फिब्व ख्यलय् तःजिक प्रदर्शन जुल । उपत्यकाव्यापी सडक विस्तार पीडित संघर्ष समितिया संयोजनय् जूगु उगु प्रदर्शनय् मेयर साहया ज्याखँपाखें पीडित जूपिं थीथी ख्यःया पुचः व मनूतय्सं ब्वति काःगु खः ।

ज्याझ्वलय् सहभागी जूपिं पुचःतय्सं ‘डोजर आतंक बन्द या’, ‘सडक विस्तारया नामय् उठिवास याये दइ मखु’, ‘महानगरपालिकाया ज्यादति बन्द या’ धकाः च्वयातःगु प्लेकार्ड ब्वया वःगु खः । लिसें थीथी खलः पुचःतय्सं थःथःपि ब्यानर नं ब्वःगु खः । ज्याझ्वलय् थीथी कथंया नेवाः अभियानया अभियन्तातय्सं ब्वति काःगु खः ।

अन हे जूगु बःचाधंगु सभायात सम्बोधन यासें आदिवासी जनजाति महासंघया पुलांम्ह न्वकु गोविन्द छन्थालं येँय् येँ देय्यात हे विनास याइम्ह मेयर माःगु मदु, उकिं येँ देय्यात विनास यायेगुपाखें रोके यायेमाः धकाः आह्वान यानादिल । वय्कलं धयादिल, ‘येँया स्थानीय जनतायात नोक्सान जुइगु ज्या यात धाःसा उकिया विरुद्ध आदिवासी जनजाति समेत सतकय् कुहां वये मालीगु जुइ ।’

सडक विस्तार आन्दोलनया न्ह्यलुवा शान्तप्रकाश श्रेष्ठं थौं सडक विस्तारया नामय् सरकारं नेवाःतय्त विस्थापित यायेत स्वयाच्वंगु दु धासें स्थानीय जनतां सडक मिचे याःगु मखु, सडकं हे स्थानीयवासीयात मिचे याना हयाच्वंगु दु धयादिल ।

नेवाः अभियन्ता रविन्द्र श्रेष्ठं मेयर बालेन्द्र साहयात मभिंगु ज्या यायेगुपाखें बचे यानाः बांलाःगु ज्या याकेत थ्व खबरदारी सभा यानागु खः धासें यदि वय्कः अटेर जुयाः न्ह्याः वनाच्वन धाःसा वय्कःयात सडक आन्दोलनपाखें वांछ्वये मालीगु अवस्था वयेफु धकाः ख्याच्वः बियादिल । ज्याझ्वलय् तुकुचा उलेगु नामय् मनपां याःगु डोजर आतंकपाखें पीडित जूपिंसं नं सम्बोधन यानादीगु खः । विरोध प्रदर्शनय् शंखमुलय् जूगु डोजर आतंकपाखें पीडित स्थानीय साहेल सिंह महर्जन, जनजाति अभियन्ता शंकर लिम्बु लगायत आपालं व्यक्तितय्सं ब्वति कयादीगु खः ।

लिपांगु इलय् मेयर साहं थीथी थासय् डोजर चले यानाः छेँ थुनेगु, निजी जग्गा कब्जा यायेत कुतः यायेगु, तुकुचा खोले यायेगु नामय् स्थानीय मनूतय्गु छेँ थुनेगु थेंज्याःगु ज्या याःगु कारणं वय्कः विरुद्ध स्थानीय जनता आक्रोशित जुयाच्वंगु दु । थज्याःगु ज्याया प्रतिकार यायेगु लागिं हे म्हिगःया खबरदारी सभा यानागु खँ ग्वसाः खलकं धाःगु दु ।

आः आन्दोलन दी मखु, न्ह्याः वनी – सुमन साय्मि
म्हिगः जूगु सभा ग्वसाः खलःया संयोजक सुमन साय्मिं थःपिंसं बालेन साहया विरुद्ध मखु, येँया जनतायात उठिबास यायेत्यंगु कुतःया विरुद्ध आन्दोलन न्ह्याकागु खँ कनादीगु दु । येँय् सुना नं थज्याःगु कुतः यानाच्वंत्तले थ्व आन्दोलन दी मखु धासें वय्कलं आः थौंया ज्याझ्वः लिपा मेगु गज्याःगु पलाः ल्ह्वनेगु धकाः थःपिंसं तयारी यायेगु खँ नं कनादीगु दु । यदि येँया मेयर माने मजुसे न्ह्याः वन धाःसा उकिया विरुद्ध मदिक्क हे आन्दोलन यायेमाःसां थःपिं न्ह्याः वनेगु खँ वय्कलं कनादिल ।