डब्लुएनओ न्वकुया राजीनामा

येँ  – हलिं नेवाः दबू (डब्लुएनओ) या येँय् जुइत्यंगु स्वक्वःगु तःमुँज्याया अन्तिम इलय् वयाः दबूया न्वकु स्वयम्भुधर तुलाधरं थःगु पदं राजीनामा बियादीगु दु । डब्लुएनओया न्हूगु नेतृत्व ल्ययेगु ज्याय् पिहां वःगु विवाद समाधान यायेगुव लागिं अन्तिम इलय् जूगु सहमति व उगु सहमति पिकायेत जूगु वहसय् पिहां वःगु थीथी खँपाखें निराश जुयाः वय्कलं राजीनामा बियादीगु खँ धाःगु दु ।

थःगु राजीनामा पती वय्कलं थःगु कार्यकालया ई प्यन्हु न्यान्हु जक ल्यं दनिगु खःसां नं थःगु पदय् कायम जुयाच्वनेगु धाःसा छुं हे औचित्य मखनागुलिं राजीनामा बियागु खँ च्वयादीगु दु । शुक्रवाः जूगु कार्यसमितिया मुँज्याय् सत्य व न्यायया लँपु काःगु मखना व थज्याःगु सहलह प्रक्रियां लिपा वइगु नेतृत्वयात अर्थपूर्ण दसु क्यनेगु वा बांलाःगु लिच्वः लाइ थें थःत मताःगु जुयाः राजीनामा बीमाःगु खँ नं वय्कलं धयादीगु दु ।

वय्कलं धयादीगु दु, ‘दुजःपिनिगु थःथः दथुइ पारस्परिक सहमति व विश्वासय् ज्या यायेदुगु जिगु लागि तःधंगु सौभाग्य खः तर आः वयाः व विश्वास व सहमति म्हो जूगु खना । उकिं थज्याःगु प्रक्रियां तापाना वनेगु हे कल्याण जुइगु तायाः जिं थ्व राजीनामा बियाच्वना ।’ताः ई अमेरिकाय् च्वनाः ज्या यानादीम्ह भाजु तुलाधरं नं डब्लुएनओ गठन यायेगु लागिं आपालं मेहनत यानादीगु खः ।

डब्लुएनओया स्वक्वःगु तःमुँज्याय् नायः पदया लागिं वर्तमान नायः सिजन श्रेष्ठ व वरिष्ठ न्वकु दया शाक्यं उम्मेदवारी बियादीगु खःसां शुक्रवाः जूगु बैठकं आः वइगु स्वदँया कार्यकाल निम्हेस्यां नं दत्या–दत्या तक नायः जुयाः चले यायेगु कथं सहमति कायम याःगु खः ।

थ्वहे झ्वलय् विहीवाःनिसें येँय् शुरु जुइगु डब्लुएनओ तःमुँज्याय् ब्वति कायेगु लागिं डब्लुएनओया वर्तमान नायः सिजन श्रेष्ठ म्हिगः नेपाः थ्यंकः झाःगु दु । वरिष्ठ न्वकु दया शाक्य लिसें मेपिं पदाधिकारीत नं कन्हय् तकया दुने येँय् थ्यनी ।

सम्बन्धित बुखँ

LEAVE YOUR COMMENTS