प्रधानमन्त्रीयात मुख्यमन्त्रीतय् ख्याच्वः
येँ (नेपालभाषा टाइम्स)÷प्रदेश सरकारतय्त संघीय सरकारपाखें बीमाःगु अधिकार माग यासें न्हय्गुलिं प्रदेशया मुख्यमन्त्रीतय्सं थौं प्रधानमन्त्री पुष्पकमल दाहालयात नापलायेत्यंगु दु । म्हिगः जूगु ‘अन्तर प्रदेश मुख्यमन्त्री बैठकं’ प्रधानमन्त्री नापलानाः सहलह यायेगु निर्णय याःगु खः । प्रधानमन्त्री नापलायेत फुक्कं मुख्यमन्त्रीत म्हिगः हे येँय् वयेधुंकूगु दु । थौं सुथय् ८ बजे प्रधानमन्त्री नापलायेगु ई क्वःछिनातःगु दु ।
प्रदेश सञ्चालनया लागिं संघीय सरकारं माःगु कानुन दयेका मबिउ धासें न्हय्गुलिं प्रदेशया मुख्यमन्त्रीत हेटौंडाय् भेला जूगु खः । बिहीवाः निसें न्ह्याःगु भेलाय् प्रदेश व स्थानीय तहया विज्ञतय्सं नं ब्वति काःगु खः ।
संघीयता कार्यान्वयनय् वःगु ताः ई दयेधुंकाः नं महत्वपूर्ण कानुनत मदयेकूगुलिं प्रदेश सरकार अधिकार सम्पन्न जुइमफुगु धासें मुख्यमन्त्रीत हेटौंडाय् मुंगु खः । थ्व स्वयां न्ह्यः नं मुख्यमन्त्रीतय्सं प्रम दाहालयात नापलानाः संविधानं बिउगु अधिकार कथं कानुन दयेकेत व अधिकार बीत माग यासें आन्दोलनय् कुहां वयेगु ख्याच्वः बिउगु खः ।
कानुन मदयाः कर्मचारी, प्रहरी, शिक्षा लगायत क्षेत्रया ज्या प्रभावित जूगु गुनासो मुख्यमन्त्रीतय्सं प्वंकेगु यानाच्वंगु दु । थ्व स्वयां न्ह्यः न्हय्गुलिं प्रदेशया मुख्यमन्त्रीतय्सं वंगु असारय् पोखराय् भेला जुयाः खुलाया दुने अधिकार बीत माःगु याःगु खः ।
LEAVE YOUR COMMENTS