ने. सं. ११४६ तछलाथ्व दशमी -

नागरिकताय् हानं न्हूगु आदेश

न्हूगु फैसला मवःतले गृह मन्त्रालयया पौ रोक्का

येँ – सर्वोच्च अदालतं जन्मया आधारय् नागरिकता काःपिं मांअबुया सन्तानयात वंशजया आधारय् नागरिकता मबीत हाकनं अल्पकालीन अन्तरिम आदेश बिउगु दु । म्हिगः न्यायाधीशपिं ईश्वरप्रसाद खतिवडा व सुष्मलता आचार्यया मंकाः इजलासं थ्व स्वयां न्ह्यः नागरिकताया विषयय् बिस्कं बिस्कं आदेश जारी जूगुलिं उकियात पूर्ण इजलासं क्वःछीगु धासें गृह मन्त्रालयं जारी याःगु परिपत्र कार्यान्वयन मयायेत अल्पकालीन अन्तरिम आदेश जारी याःगु खः ।

‘थुगु अदालतया आदेशया कार्यान्वयनय् द्विविधा खने दुगुलिं व थुुगु अदालतया आदेशय् निश्चितता व एकरुपता कायम जुइ माःगु खनेदुगुलिं विवादित कानुनी न्ह्यसःया निरुपण पूर्ण इजलासपाखें जुइमाःगु व मनासिब खनेदुगुलिं सर्वोच्च अदालत नियमावली २०७४ या नियम २३ (२) (ख) व (ग) बमोजिम न्ह्यब्वःगु निवेदन उपर सुनुवाईया निंतिं पूर्ण इजलासय् पेश या’ फैसलाय् धयातःगु दु ।

जन्मसिद्ध नागरिकया सन्तानयात वंशजया नागरिकता बीत २०७५ चैत १९ गते गृह मन्त्रालयं फुक्कं जिल्लाया प्रमुख जिल्ला अधिकारीयात पौ च्वयेवं उगु पौ कार्यान्वयन मयाकेगु माग यासें दायर जूगु निगू बिस्कं बिस्कं रिटय् बिस्कं बिस्कं हे आदेश जूगु धासें सर्वोच्चय् हाकनं निवेदन लायेवं थ्व विषययात पूर्ण इजलासय् यंकेगु फैसला जूगु खः ।

छगू हे विषयय् बिस्कं बिस्कं आदेश जूगु धासें वरिष्ठ अधिवक्ता बालकृष्ण नेउपानें सर्वोच्चय् मेगु निवेदन बीधुंकाः पूर्ण इजलाय् छ्वयेगु निर्णय याःगु खः । उगु ईया दुने गृह मन्त्रालयया पौयात यथास्थितिइ तया तयेत नं आदेश बिउगु दु । आः पूर्ण इजलासपाखें सुनुवाई जुयाः अन्तरिम आदेश जारी जुइगु मजुइगु निश्चित मजूगुलिं गृहया पौयात थाति तयेत आदेश बिउगु खः ।

नागरिकता बीथाय् निगरानी
पश्चिम पर्साया जिराभवानी गाउँपालिका–४ सपौलीइ च्वंगु इलाका प्रशासन ज्याकुथी भारतीय नागरिकं नागरिकता मकायेमाः धकाः स्थानीय जनतां निगरानी यानाच्वंगु खँ सीदुगु दु । वंशजया आधारय् नागरिकता काइपिं हुलमुल जुयाच्वंगुलिं अज्याःगु हुलमुलय् भारतीय नागरिकता कायेफइगु आशंका यासें स्थानीय जनतां निगरानी यानाच्वंगु खँ धाःगु दु ।

विसं २०६३ सं तत्कालीन जनप्रतिनिधिं ध्यबा कयाः भारतीय नागरिकता बिउगु धासें सुपौलीया रामप्रवेश राउट थारुं धयादी, ‘आःया जनप्रतिनिधि तकं आर्थिक प्रलोभनय् लानाः सुं नं भारतीययात नेपाःमि दयेकाः नक्कली नागरिकता मकायेमाः धकाः जिमिसं निगरानी यानाच्वनागु दु ।’