नगरसभा दुने नं डोजर काण्ड बारे न्ह्यसः

येँ (नेपालभाषा टाइम्स)- येँ मनपाया नगर सभा बैठकय् नं शंखमुलय् सतक तब्या यायेगु नामय् निजी जग्गा कब्जा यानाः डोजर चले याःगु खँयात कयाः वहस जुल । यँे मनपा २२ वडाया अध्यक्ष चिनीकाजी महर्जनं शंखमुलय् वकुन्हु जूगु ज्यादति बारे छानबिन यानाः दोषीयात कारवाही यायेमाः धयादिल ।

वय्कःयात लिसः बीगु लागिं प्रमुख प्रशासकीय अधिकृत बसन्त अधिकारीं उगु थासय् ‘जीएलडी’ अन्तर्गत हे सडक तब्या याये माःगु खः धासें वहे प्रक्रिया पूरा यानाः मनपां डोजर चले याःगु खः धयादिल ।

वडा अध्यक्ष महर्जनं छगू थासं दुहां वनाः मेगु थासं पिहां वयेगु निकास मदुगु लँपुइ जीएलडी चले मजुइगु कानुनी व्यवस्था दु धासें धयादिल, ‘यदि जीएलडी कथं सुयां निजी जग्गा काये माःगु हे अवस्था दुसां नं राज्यं क्षतिपूर्ति बियाः जक कायेमाः धइगु कानुन दु । मनपा अथे कानुन हाचांगायाः वने जिउ ला ?’

वय्कःया न्ह्यसःयात मेयर बालेन साहं नं लिसः बी मफुगु खःसा प्रशासकीय अधिकृतं यदि थुकी गल्ती हे जूगु खःसां वार्ता यानाः निष्कर्ष पिकाये नु धकाः प्रस्ताव तयादिल ।