नेपाःमियात सँ खाकूपिं प्यम्ह ज्वन

येँ (नेपालभाषा टाइम्स) – भारतया वाराणसीइ छम्ह नेपाःमियात जर्बजस्ती सँ खाकाः नेपाः व प्रधानमन्त्री केपी ओलीविरुद्ध नारा थ्वयेकेत बाध्य याःपिं भारतया हिन्दूवादी संगठनया प्यम्ह कार्यकर्तातय्त स्थानीय प्रहरीं ज्वंगु दु। वाराणसीया एसएसपी अमित पाठकं थ्व घटनाय् दोषीपिं सन्तोष पाण्डेय, अमित दुबे, आशीष मिश्रा व राजु यादवयात ज्वनाः उमि विरुद्ध मुद्दा दायर यायेधुनागु खँ धाःगु दु। थ्व घटनाया मूख्य अभियुक्त धयातःम्ह अरुण पाठकयात धाःसा म्हिगः सनिलय्त क ज्वनेफुगु मदुनि ।

प्रधानमन्त्री केपी ओली छुं न्हि न्ह्यव रामया जन्मभूमि अयोध्या भारतय् मखु नेपाःया ठोरीइ लाः धकाः विवादास्पद खँ न्ववानादीवं भारत हिन्दूवादीतय्सं तच्वःगु विरोध याना व याच्वंगु खः । थ्व हे झ्वलय् भारतया विश्व हिन्दू सेना नांया हिन्दूवादी संगठनया कार्यकर्तातय्सं वारणसीया गंगा किनाराय् छम्ह नेपाःमियात ज्वनाः जबर्जस्ती मुन्दन यानाः प्रधानमन्त्री ओली मुर्दावाद धयागु नारा लिसें नेपाःविरुद्ध नारा थ्वयेके बिउगु खः ।

थ्व घटनाय् जर्बजस्तीइ लाःम्ह नेपाःमियात स्थानीय प्रहरीं मालाच्वंगु दु । ज्वंपिंसं उम्ह मनूयात १५०० तका भारु बियाः सँ खायेत व नारा थ्वयेकेत तयार यानागु धाःगु दु । प्रहरीं उम्ह मनू नेपाःमि हे खः कि मखु धयागु नं सीमदुनि धाःगु दु । तर उम्ह मनू धाःसा आः बेपत्ता जुयाच्वंगु दु । उम्ह मिजंयात सँ खाकाः नारा थ्वयेके बिउगु भिडियो विश्व हिन्दू सेनां हे थःपिनि फेसबुकय् तयाबिउगु खः । थ्व भिडियो सामाजिक सञ्जालय् भाइरल जूगु खः । नेपाः व भारत दथुइ सामाजिक स्वापू हे खलल यायेगु निंतिं थज्याःगु भिडियो दयेकूगु अनुमान नं जुयाच्वंगु दु ।