दिगुख्यः गुथिया यःमरि दयेकेगु तालिम

येँ(नेपालभाषा टाइम्स)-श्री दिगुख्यः गुथि पकनाय्ज्वःपाखें यःमरि दयेकेगु तालिम बिउगु दु । गुथि अन्तर्गतया मिसा पुचलं वंगु शनिवाः छन्हुया यःमरि दयेकेगु तालिम बिउगु खः ।

गुथिया संरक्षक पुचःया नायः मोतिकाजी तुलाधरया प्रमुख आतिथ्यता व पुचःया नायः तारावीर सिंह तुलाधरया विशेष आतिथ्यताय् गुथिया मुक्कं नीखुम्ह मिसापिं जःपिंत उगु तालिम बिउगु खः । मिसा पुचःया नायः पे्रमहिरा तुलाधरं यःमरि दयेकेगु तालिम बियादिसें यःमरिया बाखं नं कनादीगु खः ।

पुचःया न्वकु दिव्यतारा तुलाधरं लसकुस यानादीगु ज्याझ्वलय् संरक्षण पुचःया नायः व ज्यासना पुचःया नायलं थःथःगु नुगःखँ कनादीगु खःसा दुजः युगलक्ष्मी तुलाधरं सुभाय् देछानादीगु खः ।

ज्याझ्वलय् तालिम कयादीपिंसं यःमरि पुन्हि न्ह्यःने थ्यंकः वयाच्वंगु इलय् थुकथंया तालिम बीगु ज्या च्वछायेबहजू धासें लिपा लिपा नं थुकथंया तालिम बिया वनेमाःगु विचाः तयादीगु खःसा मिसा पुचलं नं आवश्यकता स्वयाः तालिम संचालन यायेगु प्रतिवद्धता प्वंकूगु खः ।