निक्वः च्वकाय् थ्यंम्ह न्हापांम्ह नेवाःनी

येँ – सगरमाथा आरोही पत्रकार मय्जु कल्पना महर्जनं उत्तरी मोहडां नं सगरमाथाया सफल आरोहण यासें न्हूगु कीर्तिमान कायम यानादीगु दु । वय्कलं विहीवाः सुथय् १०.२० बजे चीनपाखें सगरमाथाया सफल आरोहण यानादीगु खः । थ्व ल्याखं वय्कः उत्तरी व दक्षिणी निगुलिं मोहडां सगरमाथाया निक्वः तक सफल आरोहण यानादीम्ह न्हापांम्ह नेवाः मिसा जुयादीगु दु ।

लिसें वय्कः थथे निगुलिं मोहडां सगरमाथाया सफल आरोह यानादीम्ह विश्वया न्हापांम्ह मिसा पत्रकार नं जुयादीगु दु । थ्व स्वयां न्ह्यः वय्कलं थगुने जेठ ९ गते कुन्हु हे मिसा पत्रकारपिनि पुचलय् समावेश जुसें सगरमाथाया सफल आरोहण यानादीगु खः । थुगुसी सगरमाथाया च्वकाय् वय्कलं यल महानगरपालिकाया ध्वाँय् ब्वयेकादीगु खः । लिसें वाङ्मय शताब्दी पुरुष सत्यमोहन जोशीया किपा सगरमाथाया च्वकाय् ब्वयेकेगु नं वय्कःया ग्वसाः दुगु खः ।