थिमिइ भुइसिन्हः जात्रा जुयाच्वन, न्हिनय् बाेडेय् म्ये प्वाःखिन
- नेपालभाषा टाइम्स
- ११३८ चौलागा चर्हे
- किपा-साभार - केके मानन्धर फेसबुक
थिमि (नेपालभाषा टाइम्स)÷ बिस्काः जात्राया झ्वलय् थौं आइतवाः थिमिइ मू जात्रा जुयाच्वंगु । थिमिइ बालकुमारी व दक्षिण बाराही लिसें स्वीनिखः द्यःखः हयाः भुइसिन्हः जात्रा न्यायेकाच्वंगु दु । स्वीनिखः द्यःखःया जात्रा जुइ धाःसां थौंकन्हय् २१ खः जक द्यः खः हयेगु यानाच्वंग दु ।
थिमिया थीथी त्वालं गणेद्यः, भैलः द्यः, बाराही द्यःया खः जात्रा यानाः बालकुमारी लागा हयाः भुइसिन्हः ह्वलाः जात्रा न्यायेकी । थ्वयां न्ह्यव म्हीग चान्हय् बालकुमारी द्यःयात कुहां बिज्याकाः चान्हय्सिया जात्रा न्यायेकूगु खः । थिमि लाय्कूया पःमाः, कसः व गुथियारपिंसं बालकुमारी द्यःयात बुया हयाः लाय्कू ध्वाखा न्ह्यःने च्वंगु खटय् तयेवं चान्हय्सिया जात्रा न्याइ ।
किपा ः रासस
जात्राया झ्वलय् म्हिगः शनिवाः त्वाःत्वालय् खटय् तयातःपिं द्यःतय् पुजा जूगु खः । छेँछेँय् नं द्यः पुज्याःवनेगु जूसां थुकुन्हु धाःसा बलि बीमखु । थुकुन्हु थिमिइ खाइक्वाति नयाः खाइसंल्हु न्यायेकी ।
बिस्काया झ्वलय् थिमिया बोडे थौं न्हिनय् म्ये प्वाः खनीगु जात्रा नं जुइ । थुगुसी नं स्थानीय बुद्धकृष्ण बागः श्रेष्ठं म्ये प्वाःखनीगु जूगु दु । जात्राया निंतिं कःमि व नाइकें द्यः पुज्याये धुंकाः पाँचो गणेद्यःया न्ह्यःने च्वंगु फल्चाय् १० इञ्च ताःहाकःगु नतूचां म्ये प्वाः खनाः नतूचा सहित चन्द्राकार भ्वाय् ज्वनाः बोडे देय् चाःहिली ।
मेखे ख्वपय् बिस्काःया झ्वलय् शनिवाः बहनी यःसिं क्वःथःगु दु ।
किपा ः रासस
तोखाय् नं बिस्काः सुरु
येँया उत्तर भेगय् लाःगु पुलांगु नेवाः बस्ति तोखा व सपनतीर्थय् शनिवाः निसें जात्रा सुरु जूगु दु । तोखाय् दँय्दसं वैशाख १ गते निसें ४ गते तक स्थानीय कुमारी, गणेद्यः, चन्देश्वरी लगायतया द्यःयात खतय् तयाः चाःहिकाः बिस्काः जात्रा न्यायेकी । जात्रा न्ह्यः थःनेलाछिया गणेद्यः न्ह्यःने वंगु वालय् हे यःसिं थंगु खः ।
प्राचीन इलय् तोखाय् बांमलाःगु शक्ति वयाः सर्वसाधारणयात दुःख बिउ वयाच्वंगुलिं अज्याःगु शक्ति बिसिके छ्वयेगु निंतिं द्यः जात्रा याना वयाच्वंगु जनविश्वास दु ।
किपा ः रासस
तोखाय् थुगुसी जात्रा व्यवस्थापन समिति दयेकाः विशेष कथं जात्रा न्यायेकाच्वंगु दु । समितिया अध्यक्ष गणेशमान श्रेष्ठया कथं जात्राय् ल्वापु मजुइकेगु निंतिं अय्लाः मीगु प्रतिबन्ध तयातःगु दुसा स्वयंसवेकतय्त थाय्थासय् खटे यानाः व्यवस्थापन यानाच्वंगु दु ।
तोखां च्वय् सपनतीर्थय् नं शनिवाः सुथय् म्वःल्हु वइपिनि भीड जुल । छन्हु न्ह्यव चान्हय् बागद्वाः चाःहिला वयाः सपनतीर्थय् म्वःल्हु वयेगु याइ । थुकिया लिसें तप्यंक सपनतीर्थय् वयाः नं म्वःल्हु वयेगु याइ । सपनतीर्थय् म्वः ल्हुत धाःसा छ्यंगू सम्बन्धी ल्वय् जुइमखु धयागु विश्वास दु ।
सपनतीर्थ मेला नं व्यवस्थित यायेत स्थानीय खलः, पुचः, क्लबतय्सं स्वय्सेवक खटे यानाः व्यवस्थापन याःगु खः ।
LEAVE YOUR COMMENTS