असनय् महापरित्राण पाठ

येँ(नेपालभाषा टाइम्स)-थनया असं त्वालय् वंगु शनिवाः महारित्राण पाठ ज्याझ्वः जुल । सकल प्राणीया सुख, शान्तिया कामना यासे अखिल नेपाल भिक्षु महासंघपाखें उगु महापरित्राण पाठ ज्याझ्वः याःगु खः ।

दाता असं बाकुननिया मोतिशोभा तुलाधरय् ब्वनाय् वय्कःया दिवतंगत जहान द्रव्यरत्न तुलाधरया पुण्यस्मृति सुगतिया कामना यासें जूगु महापरित्राण पाठ अन्नपूर्ण ज्ञानमाला भजन खलः असंपाखें भजन प्रस्तुत यासें न्ह्याःगु खः ।

वयां लिपा महापरित्राण ज्याझ्वः ग्वसाः ग्वयादीम्ह मय्जु तुलाधरलिसें सकल थःथिति, जः, उपासक उपासिकासहितं असं गुंला बाजं खलःपाखें धाःबाजं थानाः शोभायात्रा यासें असं लागा चाःहिउगु खः ।
पंचशील, बुद्धपुजालिसें न्ह्याःगु महापरित्राण पाठया झ्वलय् अष्टपरिष्कार दान नं याःगु खः ।

भिक्षु महासंघया सछि व च्याम्ह भिक्षु व अनागारिका गुरुमांपिंत दान प्रदानलिसें पुण्यानुमोदन यासें क्वचाःगु खः
उगु इलय् उपस्थित सकलसित भोजन याकूगु खःसा ज्याझ्वःया व्यवस्थापन भिंतुना गुथिं याःगु खः ।