धू ब्वःगुलिं कालिमाति–कलंकी सतक बन्द यात

येँ – कालिमाटी कलंकी सतक खण्डया स्थानीय वासिन्दा सतकय् धू ब्वयाः च्वने मफइगु अवस्था ब्वलंगु धासें आन्दोलनय् कुहां वःगु दु । सतकय् धू ब्वयाः स्वास्थ्यय् लिच्वः लानाच्वन धासें उमिसं म्हिगः सुथय् ८ बजे निसें सतक अवरुद्ध याःगु खः । आन्दोलनया कारणं कालिमाति– कलंकी सतक पूर्ण रुपं अवरुद्ध जूगु खः ।

उगु क्षेत्रया पसः तकं बन्द यानाः पसल्यात आन्दोलनय् कुहां वःगु खः । ठेकेदार रविभवनय् लँ इलय् हे मदयेकूगुलिं धू ब्वयाः च्वने मफुगु व थुकिं स्वास्थ्यय् नं गम्भीर लिच्वः लाःगु धासें स्थानीयत व पसल्यात आन्दोलनय् कुहां वःगु खः ।

लिपा ठकेदार व स्थानीय जनताया दथुइ वार्ता यायेगु क्वःजिइ धुंकाः ११.३० बजे जक सतक चायेकूगु खः । म्हिगः निसें हे ठेकेदारं रविभवन निसें कलंकी चोक तक ट्याकरं लँय् लः ह्वलेगु ज्या नं न्ह्याकूगु दु  ।