नगदेशय् आयु संस्कार परित्याग दिवस

थिमि – नगदेश बौद्ध समूह व बौद्ध ल्याय्म्ह पुचःया मंकाः ग्वसालय् सिपुन्हि (माघ पुन्हि) कुन्हु नगदेश बुद्ध विहारय् २५६२ क्वःगु आयु संस्कार परित्याग दिवस न्यायेकल । शान्तिया महानायक गौतम बुद्धं चापाल चैत्यय् आयु संस्कार परित्याग याःगु दिंया लुमन्तिइ उगु दिवस न्यायेकूगु खः ।बुद्धपुजा यानाः न्ह्याःगु ज्याझ्वलय् वयां लिपा बुद्ध मूर्तियात खतय् तयाः सांस्कृतिक बाजंलिसें नगदेश चाःहिलाः नगदेश विहारय् थ्यंकाः छगू सभाय् हिउगु खः ।

ज्याझ्वःया उलेज्या मूपाहांकथं भिक्षु वरसम्बोधिं दीप प्रज्वलन यानाः यानाबिज्याःगु खःसा पुचःया अध्यक्ष शिवभक्त मेजुं लसकुस यानादीगु खः ।
ज्याझ्वलय् बौद्ध विद्वान डा. अनुप श्रेष्ठाचार्य, डा. लक्ष्मण शाक्य, प्रा. रामकृष्ण दुवाल, समूहया सचिव कृष्णकुमार प्रजापति आयु संस्कार परित्याग दिवसया थीथी पक्षयात कयाः थःथःगु विचाः तयादीगु खः । समूहया नायः दीपकराज साँपालं नं नवनादीगु व समूहया कोषाध्यक्ष रत्नभक्त हाँय्जुं सुभाय् देछानादीगु ज्याझ्वलय् ध्यानाभावना व अष्टशील ग्रहण नं याकूगु खः ।