ने. सं. ११४३ तछलाथ्व दशमी -

फुटपाथ पसः तयेके बीगु निर्णयप्रति आपत्ति

येँ (नेपालभाषा टाइम्स) – जागरुक युवा समाज स्थापना जूगु सछिन्हु क्यंगु लसताय् छगू पत्रकार सम्मेलन जुल । पत्रकार सम्मेलनय् आः नकतिनि स्वनिगलय् निषेधाज्ञा छ्वासुकेगु झ्वलय् येँ जिल्ला प्रशासन ज्याकुथिं फुटपाथ पसः तयेके बीगु निर्णय यासें उकिया निंतिं ई क्वःछिउगु खँय् समाजं आपत्ति प्वंकूगु दु। लँजुवाःलिसें अत्यावश्यक सवारी साधनयात तकं समस्या जुयाच्वंगु व फुटपाथ पसःया कारणं अप्वः हुलमुल जुयाः कोरोना संक्रमणया नं जोखिम अप्वइगु धासें अज्याःगु पसः चिइकेमाःगु प्रशासनं हे श्रेय बिउगु धासें उकियात चिइकेत नं माग याःगु दु ।

कोरोना संक्रमणया जोखिम उच्च रुपय् दयाच्वंगु इलंनिसें हे येँया अतिकं व्यस्त लागा असं, वंघः लगायतया दुनेया लागाय् च्वंगु फुटपाथ पसः चिइकेत थःपिं सक्रिय जुयाः कुहां वयाच्वनागु समाजं दावी याःगु दु। स्थानीयवासीन्दाया स्वास्थ्य सुरक्षाया निंतिं थःपिंसं जोखिम नालाः न्ह्यचिला च्वनागु अवस्थाय् जिप्रकां फुटपाथ पसःयात प्रश्रय बियाच्वंगु समाजं द्वपं बिउगु दु ।

समाजया अध्यक्ष चन्द्र महर्जनं थनया सतक धइगु झीगु निंतिं मखसे फुटपाथ पसः तइपिनिगु निंतिं जूगु व इमिसं पसः तयेधुंकाः जक झीगु, एम्बुलेन्स व दमकल थेंज्याःगु निंतिं खः धकाः फुटपाथ व्यापारीतय्सं धायेगु यानाच्वंगु धयादिल । समाजया सल्लाहकारलिसें येँ मनपा २४ वडासदस्य विनोद तुलाधरं विशेष यानाः येँया दुनेया वस्तीइ फुटपाथ पसः तःधंगु हे समस्या जुयाच्वंगु धासें सतकया निखेरं कःघानाः पसः तइगुलिं हे दमकल, एम्बुलेन्स थेंज्याःगु सवारी साधनयात तकं गन्तव्यय् वनेत समस्या जुयाच्वंगु धयादिल ।

फुटपाथ पसः छगू तसकं तःधंगु समस्या जूगु जक खसे थुकिं बांमलाक हा कायेधुंकूगु व थुकियात ल्यहें थनाछ्वयेत हे समस्या दु धयादिल । स्वनिगःया स्वंगुलिं जिप्रकापाखें फुटपाथ पसः नं तयेके बीगु निर्णय यायेवं असं, वंघः, न्हूसतक, लगायतया थासय् उकथं पसः तयेगु शुरु जुइधुंकूगु दु। समाजया सचिव संजय महर्जन, प्रेस सल्लाहकार विराजकाजी राजोपाध्याय लगायतं नं नुगःखँ तयादीगु खः ।