ने. सं. ११४४ चौलाथ्व दशमी -

मन्त्रालय सिबें मन्त्री जुइपिं अप्वः

येँ (नेपालभाषा टाइम्स)- प्रधानमन्त्री पुष्पकमल दाहालं संसदय् विश्वासया मत कयाः जक मन्त्रिमण्डल विस्तार याइगु जूगु दु । थ्वहे वइगु पुस २५ गते संसदया बैठकय् वय्कलं विश्वासया मत कायेगु तयारी यानाच्वंगु खँ सीदुगु दु ।

म्हिगः च्वंगु सत्ता साझेदार दलतय् बैठकय् दाहालं विस्वासया मत कयाः जक मन्त्रिमण्डल विस्तार यायेगु थःगु योजना कनादीगु खः । प्रधानमन्त्री निवास बालुवाटरय् च्वंगु उगु बैठकं न्यान्हुया दुने न्यूनतम मंकाः ज्याझ्वः क्वःछीगु निंतिं छगू समिति नं दयेकूगु दु । नेकपा एमालेया अध्यक्ष केपी शर्मा ओलीया संयोजकत्वय् दयेकूगु उगु समितिइ सरकारय् दुथ्याःगु फुक्कं दलपाखें छम्ह छम्ह दुजः तइगु खँ दु ।

आः जुइगु मन्त्रिमण्डल विस्तार लिपा मन्त्रीतय् ल्याः नीन्याम्ह थ्यनीगु अनुमान जुयाच्वंगु दु । तर मन्त्री जुइत आकांक्षीत अप्वः दुगु जुयाः मन्त्रि–मण्डलया ल्याः नीन्याम्ह स्वयां अप्वः थ्यंके मालीगु अवस्था जुयाच्वंगु खँ धाःगु दु ।

आः मन्त्रिमण्डल विस्तार याइबलय् उकी नेकपा (एमाले)पाखें झिम्ह, माओवादी केन्द्रपाखें न्हय्म्ह, राष्ट्रिय स्वतन्त्र पार्टी व जसपापाखें स्वम्ह स्वम्ह अले जनमत पार्टीपाखें निम्ह मन्त्री थपे याइगु खँ दु ।
मन्त्रिमण्डलय् आः दुपिं च्याम्ह दुजः समेत यायेबलय् थुलि थपे याइबलय् हे २५ म्ह थ्यनी ।

यदि राप्रपां नं सरकारय् ब्वति कायेगु धाल धाःसा उगु पार्टीपाखें नं स्वम्हेसित मन्त्री दयेके मालीगु अवस्था दुसा नागरिक उन्मुक्ति पार्टीं नं निगू मन्त्रालयया दावी यानाच्वंगु खँ सीदुगु दु । थुकिं यानाः मन्त्रिमण्डल तसकं तःधं जुइगु सम्भावना ब्वलंगु दु ।

उकथं हे सरकारयात समर्थन याःपिं स्वम्ह स्वतन्त्र सांसदतय्सं नं मन्त्री जुइ दयेमाः धकाः लबिङ यानाच्वंगु दुसा मेखे माधव नेपालया नेकपा (एस) नं सरकारय् वनीगु खँ जुयाच्वंगु दु ।