येँ महानगरं संघ व प्रदेशया योजनाया स्थलगत अनुगमन याइगु

येँ(नेपालभाषा टाइम्स)- येँ महानगरपालिकां संघ व प्रदेश पूर्वाधार विकास ज्याझ्वःया स्थलगत अनुगमन याइगु जूगु दु । महानगरपालिकां निगू तहया सरकारया प्रदेश व पूर्वाधार ज्याझ्वःया २७ गू योजनाया स्थलगत अनुगमन यायेत्यंगु खः ।

येँ महानगरपालिकाया उपप्रमुख सुनिता डंगोलया अध्यक्षताय् च्वंगु बैठकं उगु निर्णय याःगु खः । अनुगमन तथा मूल्यांकन समितिया संयोजक तकं जुयाच्वनादीम्ह उपप्रमुख डंगोलया अध्यक्षताय् च्वंगु बैठकं थ्वयां न्ह्यःया आर्थिक दँया दायित्वपाखें सरे जुया वःगु योजनाया अनुगमन यायेगु निर्णय याःगु खः ।

बैठकं महानगर दुनेया सार्वजनिक निजी साझेदारी ज्याझ्वः अन्तर्गत निर्माण व संचालन जुयाच्वंगु योजना, कृषि, सिसाबुसा, न्या, ला, मरमसलालिसें नसाज्वलं, वासः लगायत मेमेगु वस्तुया क्षेत्रय् अनुगमन यायेगु निर्णय याःगु दु ।

उपप्रमुख डंगोलं अनुगमन धइगु नखःचखः न्ह्यःने वल कि जक यायेगु ज्या मखु, थ्व नियमित प्रक्रिया खः धासें अनुगमनया झ्वलय् अनुचित क्रियाकलाप याइपिं कारवाहीया दायराय् हयेमाःगु नं धयादीगु दु । अनुगमनपाखें बजाः सुधार याये फइगु अपेक्षा नं वय्कलं यानादीगु दु ।

क्लष्टर व क्षेत्र छुटे यानाः पुचः पुचः दयेकाः अनुगमनयात नियमित यायेत इनाप यासें वय्कलं मसः, मसिउपिंत स्यनेगु, मथूपिंत थुइकेगु व मिले मजूथाय् मिले याना वनेगु निंतिं हं हःपाः बिया वनेमाःगु खँय् बः बियादीगु दु ।

बैठकय् सार्वजनिक निजी साझेदारी ज्याझ्वः अन्तर्गत संचालनय् दुगु आकाशे ताँ, न्हूगु बसपार्कया गुरुयोजना व संरचना निर्माण, काठमाडौं भ्यू टावर निर्माण लगायतया विषयय् सहलह जूगु खः ।