बिष्णुमति लिंकरोडया विकास योजना अलपत्र

येँ -दिगो शहरी यातायात व्यवस्थापन यायेगु कथं येँया थीथी थासय् न्ह्यानाच्वंगु आयोजना आः अलपत्रय् लानाच्वंगु खँ सीदुगु दु ।
एशियाली विकास बैंकया आर्थिक ग्वाहालिइ येँया बिष्णुमति लिंकरोडय् ‘काठमाडौं सस्टेनेबल अर्वान ट्रान्सपोर्ट’ आयोजना दयेकेगु ज्या थाति लानाच्वंगु खः । भुखाय् ब्वये न्ह्यःहे दयेकेगु तयारी जुयाच्वंगु उगु ज्या छु जुयाच्वन धइगु बारे स्पष्ट मजूनि ।

आयोजनया कथं बिष्णुमति खुसि सिथय् पर्यटकीय बस पार्किङ यायेगु लिसें येँया कोर एरियाय् दुहां वयेगु लँपुया विकास यायेगु जक मखुसें कोर एरिया हे विकास यायेगु कथं उगु आयोजनां ज्या न्ह्याकूगु खः ।

बिष्णुमति खुसिनिसें येँया कोर एरियायात ‘हेरिटेज वाक’ या रुपय् विकास यायेगु व अन पर्यटकीय चहलपहल अप्वयेकेगु ग्वसाः दुगु खः ।
लिसें बिष्णुमतिया थीथी थासय् ताँ दयेकेगु व ताँया क्वं नं लँपु पिकायेगु नं ग्वसाः दुगु खः । अथेहे तपिंताँनिसें डल्लु चौतारी तक फ्लाइओभर दयेकेगु योजना नं उगु आयोजनाय् दुथ्याकातःगु दु ।